മാനന്തവാടി: കൗമാരത്തിന്റെ കായിക കുതിപ്പിന് ഇന്ന് മാനന്തവാടി ഗവ. വൊക്കേഷനല്‍ ഹയര്‍ സെക്കന്‍ഡറി സ്‌കൂളില്‍ ആരംഭമാകും. മൂന്ന് ഉപജില്ലകളില്‍ നിന്നും ഒരു സ്‌പോര്‍ട്‌സ് ഡിവിഷനില്‍ നിന്നുമായി 1000 ത്തോളം കായിക താരങ്ങളാണ് എട്ടാമത് റവന്യൂ ജില്ലാ സ്‌കൂള്‍ കായിക മേളയില്‍ മാറ്റുരക്കുന്നത്. കഴിഞ്ഞ രണ്ടു വര്‍ഷങ്ങളിലും മേളയില്‍ ജേതാക്കളായ മീനങ്ങാടി ജി.വി.എച്ച്.എസ്.എസും കാക്കവയല്‍ ജി.വി.എച്ച്.എസ്.എസും തമ്മിലായിരിക്കും ഇത്തവണയും പ്രധാന മത്സരം.
ഇന്ന് ഉച്ചയ്ക്ക് രണ്ടുമണിക്ക് മേളയിലെ കായിക താരങ്ങളുടെ രജിസ്‌ട്രേഷന്‍ നടക്കും. 24 ഇനങ്ങളിലാണ് ഇന്ന് മത്സരം നടക്കുക. നാളെയാണ് മേളയുടെ ഔദ്യോഗിക ഉദ്ഘാടനം. 25ന് രാവിലെ ഒന്‍പതരക്ക് മാനന്തവാടി പഴശ്ശി കുടീരത്തില്‍ നിന്ന് ദീപശിഖാ പ്രയാണം ആരംഭിക്കും.
എ.എസ്.പി. ജി ജയദേവ് ദീപം കൊളുത്തും. ഒ.ആര്‍ കേളു എം.എല്‍.എ കായികമേള ഉദ്ഘാടനം ചെയ്യും. ജില്ലാ പഞ്ചായത്ത് പ്രസിഡന്റ് ടി ഉഷാകുമാരി മുഖ്യാതിഥിയാകും. 26ന് സമാപന സമ്മേളനം സി.കെ ശശീന്ദ്രന്‍ എം.എല്‍.എ ഉദ്ഘാടനം ചെയ്യും. ഐ.സി ബാലകൃഷ്ണന്‍ എം.എല്‍.എ സമ്മാനദാനം നിര്‍വഹിക്കും.