സുല്‍ത്താന്‍ ബത്തേരി: കഞ്ചാവ് വില്‍പ്പന ചോദ്യം ചെയ്തതിന് യുവാവിനെയും നാട്ടുകാരെയും കഞ്ചാവ് മാഫിയ ആക്രമിച്ചു. ബത്തേരി മൂന്നാംമൈല്‍ അച്ചുതൊടുകയില്‍ ഹനീഫയ്ക്കും കുടുംബത്തിനും സമീപവാസികള്‍ക്കുമാണ് മര്‍ദനമേറ്റത്. ഇതുമായി ബന്ധപെട്ട് ഏഴുപേരെ പൊലിസ് അറസ്റ്റ് ചെയ്തു. കുപ്പാടി സ്വദേശികളായ ഷിറാസ് (23), സജീഷ് (22), സുബീര്‍ (20), അക്ഷയ (18), അരുണ്‍ (20), വിനീഷ് (19), ജിബിന്‍ (18) എന്നിവരെ വധശ്രമം അടക്കമുള്ള വകുപ്പുകള്‍ പ്രകാരം അറസ്റ്റിലായത്.
കഴിഞ്ഞ ദിവസം ബത്തേരി മൂന്നാംമൈലില്‍ കഞ്ചാവ് വാങ്ങാനെത്തിയ മൂന്നംഗ സംഘത്തെ പ്രദേശവാസിയായ ഹനീഫ ചോദ്യം ചെയ്തതിനെ തുടര്‍ന്നാണ് ആക്രമണം. ഹനീഫ ചോദ്യം ചെയ്തതോടെ ഇവര്‍ രോഷകുലരാവുകയും തുടര്‍ന്ന് സംഘത്തിലെ മറ്റുള്ളവരെ വിവരമറിയിക്കുകയുമായിരുന്നു.
പിന്നീട് മൂന്ന് ബൈക്കുകളിലായി എത്തിയ സംഘം വീട്ടില്‍ അതിക്രമിച്ചുകയറി ഹനീഫയെയും ഭാര്യയെയും മര്‍ദിച്ചു. സമീപവീടുകളിലെ സ്ത്രീകള്‍ ഓടിയെത്തി തടയാന്‍ ശ്രമിച്ചപ്പോള്‍ സംഘം ഇവരെയും മര്‍ദിച്ചു.