കാഞ്ഞങ്ങാട്: ദേശീയ ബാലശാസ്ത്ര കോണ്‍ഗ്രസ് സമ്മേളനത്തിലേക്കു മൂന്നാം തവണയും കാഞ്ഞങ്ങാട് ദുര്‍ഗാ ഹയര്‍സെക്കന്‍ഡറി സ്‌കൂള്‍ വിദ്യാര്‍ഥികള്‍ തിരഞ്ഞെടുക്കപ്പെട്ടു. ഇലവളങ്ങള്‍ പച്ചക്കറി കൃഷിയെ എങ്ങിനെ സ്വാധീനിക്കുന്നുവെന്ന മൂന്നു തരത്തിലുള്ള പരീക്ഷണ വിഷയമാണ് ഈ സ്‌കൂളിലെ വിദ്യാര്‍ഥികള്‍ ബാലശാസ്ത്ര കോണ്‍ഗ്രസില്‍ അവതരിപ്പിച്ചത്. മഹാരാഷ്ട്രയിലെ ബാരാമതിയില്‍ ഡിസംബര്‍ 25 മുതല്‍ 30 വരെ നടക്കുന്ന ദേശീയ ബാല കോണ്‍ഗ്രസ് മത്സരത്തില്‍ സ്‌കൂളിലെ വിദ്യാര്‍ഥികളായ രാജലക്ഷ്മി,ജാനുശ്രീ,അക്ഷയ്,വിവേക്,കൃഷ്ണന്‍,വിഘ്‌നേഷ് എന്നിവര്‍ സംബന്ധിക്കും. പരീക്ഷണങ്ങള്‍ക്കു നേതൃത്വം നല്‍കുന്നത് സ്‌കൂളിലെ ശശീന്ദ്രന്‍ എന്ന അധ്യാപകനാണ്.പടന്നക്കാട് കാര്‍ഷിക കോളജിലെ പ്രൊഫ. ശ്രീകുമാര്‍ കുട്ടികള്‍ക്കു വേണ്ട സഹായങ്ങളും നല്‍കുന്നു.