കൊച്ചി: എറണാകുളം മഹാരാജാസ് കോളജ് ഗ്രൗണ്ടില്‍ നടക്കുന്ന 15-ാമത് എറണാകുളം റവന്യൂ ജില്ലാ കായികമേളയുടെ രണ്ടാം ദിനം എതിരാളികളെ നിഷ്പ്രഭരാക്കി കോതമംഗലത്തിന്റെ ജൈത്രയാത്ര തുടരുന്നു. മൂന്ന് മീറ്റ് റെക്കോഡുകള്‍ ഉള്‍പ്പെടെ 462 പോയിന്റുമായാണ് കോതമംഗലത്തിന്റെ കുതിപ്പ്. 30 സ്വര്‍ണവും 23 വെള്ളിയും 18 വെങ്കലവുമാണ് കോതമംഗലം ഉപജില്ല ഇന്നലെ കരസ്ഥമാക്കിയത്. ഇതോടെ ആകെ 53 സ്വര്‍ണവും 46 വെള്ളിയും 39 വെങ്കലവും കോതമംഗലം സ്വന്തമാക്കിയത്.
രണ്ടാം സ്ഥാനത്തുള്ള എറണാകുളത്തിനാകട്ടെ ഏഴ് സ്വര്‍ണവും അഞ്ച് വെള്ളിയും നാല് വെങ്കലവുമുള്‍പ്പെടെ 65 പോയിന്റുകളാണ് ആകെ നേടാനായത്. മുന്നാം സ്ഥാനത്തുള്ള പെരുമ്പാവൂരിന് രണ്ട് സ്വര്‍ണവും അഞ്ച് വെള്ളിയും രണ്ട് വെങ്കലവുമുള്‍പ്പെടെ 30 പോയിന്റുകളാണുള്ളത്.
കോതമംഗലത്തിനുവേണ്ടി മാര്‍ബേസില്‍ ഹയര്‍സെക്കന്‍ഡറി സ്‌കൂളും സെന്റ് ജോര്‍ജ് ഹയര്‍സെക്കന്‍ഡറി സ്‌കൂളുമാണ് കുതിപ്പ് നടത്തുന്നത്. 25 സ്വര്‍ണവും 30 വെള്ളിയും 16 വെങ്കലവുമടക്കം 231 പോയിന്റുമായി മാര്‍ബേസില്‍ ഒന്നാം സ്ഥാനത്താണ്. 16 സ്വര്‍ണവും 13 വെള്ളിയും 15 വെങ്കലവുമായി 134 പോയിന്റോടെ സെന്റ് ജോര്‍ജ് ഹയര്‍സെക്കന്‍ഡറി സ്‌കൂള്‍ രണ്ടാം സ്ഥാനത്തുണ്ട്. എട്ട് സ്വര്‍ണവും മൂന്ന് വെള്ളിയും ആറ് വെങ്കലവും നേടി കോതമംഗലം ഗവ.വി.എച്ച്.എസ്.എസ് മൂന്നാം സ്ഥാനത്താണ്. രണ്ടാം ദിനം ട്രിപ്പിള്‍ മൂന്ന് താരങ്ങളാണ് ട്രിപ്പിള്‍ സവര്‍ണം നേടിയത്. സെന്റ് ജോര്‍ജ്ജിന്റെ മണിപ്പൂരി താരം വാരിഷ് ബോഗിമയൂം, മാര്‍ബേസിലിന്റെ ബിബിന്‍ ജോര്‍ജ്ജ്, അബിഷ പി എന്നിവരാണ് മത്സരിച്ച മൂന്ന് വ്യക്തിഗത ഇനങ്ങളിലും സ്വര്‍ണം നേടിയത്.
മീറ്റിന്റെ രണ്ടം ദിനത്തില്‍ നാല് സംസ്ഥാന റെക്കോഡുകളാണ് പിറന്നത്. ജൂനിയര്‍ ആണ്‍കുട്ടികലുടെ പോള്‍വാട്ടില്‍ കോതമംഗലത്തിന്റെ അനീഷ് മധുവും സീനിയര്‍ ആണ്‍കുട്ടികളുടെ 110 മീറ്റര്‍ ഹഡില്‍സില്‍ ഓംകാര്‍ നാഥ്, ജുനിയര്‍ പെണ്‍കുട്ടികളുടെ നൂറു മീറ്റര്‍ ഹഡില്‍സില്‍ മുംതാസ് സി.എസ് എന്നിവരാണ് സംസ്ഥാന റെക്കോഡ് ഭേദിക്കുന്ന പ്രകടനങ്ങള്‍ നടത്തിയത്. 37 ഇനങ്ങളിലാണ് ഇന്നലെ ഫൈനല്‍ നടന്നത്. അവസാന ദിനമായ നാളെ 23 ഇനങ്ങളില്‍ ഫൈനല്‍ നടക്കും.
ഇന്ന് നടക്കുന്ന സമാപന സമ്മേളനം പി.ടി തോമസ് എം.എല്‍.എ ഉദ്ഘാടനം ചെയ്യും. എം സ്വരാജ് എം.എല്‍.എ അധ്യക്ഷതവഹിക്കും. കൊച്ചി നഗരസഭ മോയര്‍ സൗമിനി ജെയിന്‍ സമ്മാനങ്ങള്‍ വിതരണം ചെയ്യും.