ചേര്‍ത്തല : മദ്യലഹരിയില്‍ ആക്രമണം നടത്തിയ യുവാവിനെ പൊലീസ് അറസ്റ്റു ചെയ്തു. മദ്യലഹരിയില്‍ ഹോട്ടലും സമീപത്തെ വീടുകളും ആക്രമിച്ച യുവാവിനെയാണ് അറസ്റ്റ് ചെയ്തത്.വാരനാട് ഇടത്തുരുത്ത് വീട്ടില്‍ ദീപേഷാണ് പിടിയിലായത്.
വാരനാട് കവലയ്ക്ക് സമീപത്തെ ടോമി കലവാണിയുടെ ഉടമസ്ഥതയിലുള്ള കെ.ടി.എച്ച് ഹോട്ടലിനു നേരെയും സമീപത്തുള്ള ടോമിയുടെ ബന്ധുക്കളായ ആഞ്ഞിലക്കാട്ട് വിനോദ് മാത്യു, സിജോ ആന്റണി എന്നിവരുടെ വീടുകള്‍ക്കു നേരെയുമാണ് ഇന്നലെ ഉച്ചയ്ക്ക് ആക്രമണം നടത്തിയത്. ഇരുമ്പുപൈപ്പുമായി എത്തിയ ഇയാള്‍ ഹോട്ടലിലെ കസേരകളും മേശയും തകര്‍ത്തു. തുടര്‍ന്ന് വിനോദിന്റെ വീടിന്റെ ജനല്‍ചില്ലുകള്‍ തകര്‍ക്കുകയും ടൈലുകള്‍ നശിപ്പിക്കുകയും ചെയ്തു. ഇതിനുശേഷമാണ് സമീപത്തെ സിജോ ആന്റണിയുടെ വീട്ടിലെത്തി ഇവിടെ പാര്‍ക്ക് ചെയ്തിരുന്ന ബൈക്ക് അടിച്ചുതകര്‍ക്കുകയും വാതില്‍ നശിപ്പിക്കുകയും ചെയ്തത്.
വിവരമറിഞ്ഞെത്തിയ ചേര്‍ത്തല എസ്.ഐ എം.എം.ഇഗ്‌നേഷ്യസിന്റെ നേതൃത്വത്തിലുള്ള പൊലീസ് സംഘം ഇയാളെ കസ്റ്റഡിയിലെടുക്കുകയായിരുന്നു. പ്രതിയെ ഇന്ന് കോടതിയില്‍ ഹാജരാക്കും.