ആറ്റിങ്ങല്‍: പയ്യന്നൂര്‍ വധക്കേസിലെ പ്രതിയെന്നു സംശയിക്കുന്നയാള്‍ പൊലിസ് കസ്റ്റഡിയില്‍.
പയ്യന്നൂര്‍ ധനരാജ് വധക്കേസുമായി ബന്ധമുണ്ടെന്ന് കരുതുന്ന ആര്‍.എസ്.എസ് ജില്ലാ പ്രമുഖ് പാറശാല പരശുവയ്ക്കല്‍ സ്വദേശി കണ്ണന്‍ എന്നു വിളിക്കുന്ന അജീഷ്( 28) നെ ആറ്റിങ്ങല്‍ പൊലിസിന്റെ സഹായത്തോടെ കണ്ണൂര്‍, പയ്യന്നൂര്‍ പൊലിസ് പിടികൂടിയത്. ഇന്നലെ വൈകീട്ട് നാലു മണിയോടെ ചിറയിന്‍കീഴ് പുളിമുട് ജങ്്ഷനുസമീപത്തു നിന്നുമാണ് ഇയാളെ പിടികൂടിയത്.
ആറ്റിങ്ങല്‍ ആര്‍.എസ്.എസ് കാര്യാലയത്തില്‍ കഴിയുകയാണെന്ന് പയ്യന്നൂര്‍ പൊലിസിന് വിവരം ലഭിച്ചതിനെതുടര്‍ന്ന് രണ്ടു ദിവസമായി അവിടെ നിന്നുള്ള പൊലിസ് സംഘം നീരിക്ഷണം നടത്തി വരികയായിരുന്നു. ഇയാളെ പയ്യന്നൂര്‍ പൊലീസിന് കൈമാറി. ആറ്റിങ്ങല്‍ ഡി.വൈ.എസ്.പി ടി.അജിത്കുമാര്‍, സി.ഐ ജി.സുനില്‍കുമാര്‍ എന്നിരുടെ നേതൃത്വത്തിലാണ് ഇയാളെ പിടികൂടിയത്. ജില്ലാ പ്രമുഖിനെ അകാരണമായി അറസ്റ്റു ചെയ്തുഎന്നാരോപിച്ച് ആര്‍.എസ്.എസ് പ്രവര്‍ത്തകര്‍ ആറ്റിങ്ങലില്‍ പ്രകടനം നടത്തി.