കൊല്ലം: മുന്നൊരുക്കങ്ങളില്ലാതെ അഞ്ഞൂറ് ആയിരം നോട്ടുകള്‍ പിന്‍വലിച്ച് രാജ്യത്തെ ജനജീവിതം ദുസ്സഹമാക്കിയ നടപടിയിലൂടെ മോദി ബി.ജെ.പി മുക്ത ഭാരതത്തിന് തുടക്കം കുറിച്ചിരിക്കയാണെന്ന് കെ.പി.സി.സി വൈസ് പ്രസിഡന്റ് എം.എം ഹസ്സന്‍ പറഞ്ഞു. ദേശീയ കര്‍ഷക തൊഴിലാളി ഫെഡറേഷന്‍ കൊല്ലത്ത് സംഘടിപ്പിച്ച കളക്‌ട്രേറ്റ് മാര്‍ച്ചും ധര്‍ണ്ണയും ഉദ്ഘാടനം ചെയ്യുകയായിരുന്നു അദ്ദേഹം.
കര്‍ഷകര്‍ ദുരിതത്തിലാണ്. ക്ഷേമ പെന്‍ഷനും ബോണസ് കുടിശ്ശികയും വിദ്യാഭ്യാസ ആനുകൂല്യങ്ങളും കര്‍ഷകര്‍ക്ക് നല്‍കണം. പ്രതിപക്ഷത്തിരിക്കുമ്പോള്‍ കര്‍ഷകര്‍ക്ക് സ്തുതിഗീതം പാടുകയും ഭരണത്തിലേറിയാല്‍ തിരിഞ്ഞുപോലും നോക്കാത്ത ഇടതുമുന്നണിയുടെ കാപഠ്യം തിരിച്ചറിയണം. സഹകരണ ബാങ്കുകളില്‍ കള്ളപ്പണമാണെന്ന് കേന്ദ്ര ധനകാര്യമന്ത്രിയെ തെറ്റിദ്ധരിപ്പിച്ച സി.പി.എം പോളിറ്റ്‌ബ്യേൂറോ അംഗം മുഹമ്മദ് സലീമിനെ പാര്‍ട്ടിയില്‍ നിന്ന് പുറത്താക്കി സഹകരണമേഖലയോടുള്ള നിലപാട് സി.പി.എം വ്യക്തമാക്കണമെന്നും ഹസ്സന്‍ ആവശ്യപ്പെട്ടു.
ഡി.കെ.ടി.എഫ് ജില്ലാ പ്രസിഡന്റ് പി ശിവാനന്ദന്‍ അധ്യക്ഷനായി. കെ.കെ സുനില്‍കുമാര്‍,നാണുമാസ്റ്റര്‍, വടക്കേവിള ശശി, പി ജര്‍മ്മിയാസ്, സൂരജ് രവി, രമാഗോപാലകൃഷ്ണന്‍, നെടുങ്ങോലം രഘു, വിജയസേനന്‍, വിനോദ്, എംഡി ഫിലിപ്പ്, ബഷീര്‍,രാധാകൃഷ്ണന്‍, രാധാകൃഷ്ണന്‍, ശരത് ചന്ദ്രന്‍, നാസ്സര്‍,സുബ്രഹ്മണ്യം, എന്‍ കൃഷ്ണ കുമാര്‍, പ്രിന്‍സ്, പ്രദീപ് തുടങ്ങിയവര്‍ സംസാരിച്ചു.