തിരുവനന്തപുരം: സംസ്ഥാനസര്‍ക്കാരിലെയും പൊതുമേഖലയിലെയും മുഴുവന്‍ ജീവനക്കാര്‍ക്കും വിരമിച്ചവര്‍ക്കും ശമ്പളവും പെന്‍ഷനും പൂര്‍ണമായി കൈപ്പറ്റാന്‍ അനുവദിക്കണമെന്നും അതിനായി നിലവിലെ നിയന്ത്രണങ്ങളില്‍ ഇളവു നല്‍കണമെന്നും സംസ്ഥാന സര്‍ക്കാര്‍ കേന്ദ്രത്തോടാവശ്യപ്പെട്ടു. ധനമന്ത്രി തോമസ് ഐസക് ഇന്നലെ കേന്ദ്രധനമന്ത്രി അരുണ്‍ ജെയ്റ്റ്‌ലിക്ക് ഇക്കാര്യം ആവശ്യപ്പെട്ട് കത്തയച്ചു. ശമ്പള ബില്‍ ഒന്നിച്ചു മാറ്റി ജീവനക്കാര്‍ക്കു നേരിട്ടു വിതരണം ചെയ്യുന്ന ഓഫിസുകള്‍ക്കു നല്‍കാന്‍ മതിയായ പണം മുന്‍കൂര്‍ നല്‍കണമെന്നും ആവശ്യപ്പെട്ടിട്ടുണ്ട്.
ശമ്പള വിതരണവുമായി ബന്ധപ്പെട്ട പ്രശ്‌നങ്ങള്‍ കത്തില്‍ വിശദീകരിച്ചിട്ടുണ്ട്. മൂന്നു തരത്തിലാണു ശമ്പളം നല്‍കുന്നത്. അഞ്ചരലക്ഷത്തോളം പേര്‍ക്കു നേരിട്ട് ബാങ്ക് അക്കൗണ്ടിലേക്കു നല്‍കും. നാലരലക്ഷത്തോളം പേര്‍ക്കു നേരിട്ട് ട്രഷറി അക്കൗണ്ടിലേക്കും നല്‍കും. ശേഷിച്ച ഏതാണ്ട് 50,000 പേര്‍ക്ക് ഓഫിസിലെ ഡ്രോയിങ് ആന്‍ഡ് ഡിസ്‌ബേഴ്‌സിങ് ഓഫിസര്‍ ബില്ലു മാറ്റി നേരിട്ടു വിതരണം ചെയ്യുകയാണു ചെയ്യുന്നത്. ഒരാഴ്ചകൊണ്ടാണ് ഇതു പൂര്‍ത്തിയാകുക. ഒന്നാം ദിവസം മുതല്‍ യഥാക്രമം 750, 700, 450, 400, 300, 250, 250 കോടി രൂപവീതം ആകെ 3100 കോടി രൂപ ഇതിനു ചെലവാകും. ക്ലാസ് 3, 4 വിഭാഗത്തില്‍പ്പെട്ട ജീവനക്കാരും വലിയവിഭാഗം പെന്‍ഷന്‍കാരും മുന്‍മാസത്തെ ചെലവുകള്‍ നടത്തിയതിന്റെ കട ബാധ്യത അടുത്തമാസത്തെ ആദ്യരണ്ടാഴ്ചയിലാണു തീര്‍ക്കുന്നത്.
അതുകൊണ്ട് ആ ദിവസങ്ങളില്‍ പണം ചെലവാക്കാന്‍ കഴിയുന്നുവെന്ന് ഉറപ്പാക്കേണ്ടതുണ്ട്. ഇതു തടസപ്പെട്ടാല്‍ അവരുടെ കടക്കാരായ ആളുകളും കടുത്ത ദുരിതത്തിലാകും.  24,000 രൂപ മാത്രമേ പിന്‍വലിക്കാന്‍ അനുവദിക്കൂ എന്ന നിയന്ത്രണം ആദ്യ രണ്ടാഴ്ചത്തേക്കു ജീവനക്കാര്‍ക്ക് ഇളവു ചെയ്യണം. ശമ്പളം, പെന്‍ഷന്‍ എന്നിവയേക്കാള്‍ അധികമല്ലാത്ത തുക  ബാങ്കുകളിലും ട്രഷറികളിലും നിന്നു പണമായി പിന്‍വലിക്കാന്‍ ആദ്യ പത്തുദിവസം അനുവദിക്കണം.
ശമ്പളം പണമായി വിതരണം ചെയ്യുന്ന ഓഫിസുകളിലേക്കു മാറ്റിനല്‍കാന്‍ ട്രഷറി ഡയറക്ടര്‍ ആവശ്യപ്പെടുന്ന ധനം മുന്‍കൂര്‍ നല്‍കാന്‍ റിസര്‍വ് ബാങ്കിനു നിര്‍ദേശം നല്‍കണം. ജീവനക്കാരെയും പെന്‍ഷന്‍കാരെയും കഷ്ടപ്പെടുത്താത്ത തരത്തില്‍ നോട്ടുനിരോധന വിജ്ഞാപനത്തില്‍ ഭേദഗതി വരുത്തണമെന്നും തോമസ് ഐസക് കത്തില്‍ ആവശ്യപ്പെട്ടിട്ടുണ്ട്.