ഫത്തോര്‍ഡ: അവസാന നിമിഷം സ്റ്റീഫന്‍ പിയേഴ്‌സന്‍ നേടിയ ഗോള്‍ അത്‌ലറ്റിക്കോ ഡി കൊല്‍ക്കത്തെക്കെതിരായ പോരാട്ടത്തില്‍ എഫ്.സി ഗോവയുടെ വിധിയെഴുതി. ഐ.എസ്.എല്ലിലെ നിര്‍ണായക പോരാട്ടത്തില്‍ ഗോവയെ 2-1നു തകര്‍ത്ത് അത്‌ലറ്റിക്കോ സെമി സാധ്യതകളിലേക്ക് കൂടുതല്‍ അടുത്തു. തോല്‍വിയുടെ ഗോവയുടെ പ്രതീക്ഷകള്‍ ഏറെക്കുറേ അവസാനിക്കുകയും ചെയ്തു.  28ാം മിനുട്ടില്‍ യുവാന്‍ ബെലന്‍ങ്കോസോയിലൂടെ അത്‌ലറ്റിക്കോ മുന്നിലെത്തി. എന്നാല്‍ 80ാം മിനുട്ടില്‍  മന്ദര്‍ റാവു ദേശായി ഗോവയെ ഒപ്പമെത്തിച്ചു. കളി അവസാനിക്കാന്‍ നിമിഷങ്ങള്‍ മാത്രമുള്ളപ്പോള്‍ ഗോവയുടെ ഹൃദയം പിളര്‍ത്തി പിയേഴ്‌സന്‍ വല കലുക്കിയതോടെ സ്വന്തം മണ്ണില്‍ അവര്‍ വീണു.