പൊന്നാനി: തുറമുഖ വകുപ്പിനു കീഴിലുള്ള പൊന്നാനിയിലെ കടവുകളില്‍നിന്നു മണലെടുപ്പ് പുനരാരംഭിക്കാന്‍ ധാരണയായി. തിരുവനന്തപുരത്തു വിവിധ തൊഴിലാളി യൂനിയന്‍ നേതാക്കളുമായി നടത്തിയ ചര്‍ച്ചയ്ക്കു ശേഷമാണ് ധാരണയായത്.
പൊന്നാനി നഗരസഭ, പുറത്തൂര്‍ പഞ്ചായത്ത് എന്നിവിടങ്ങളില്‍ പ്രവര്‍ത്തിച്ചിരുന്ന തുറമുഖ വകുപ്പിന്റെ കടവുകളില്‍നിന്നാണ് മണലെടുപ്പ് പുനരാരംഭിക്കുക. വര്‍ഷങ്ങളായി ഇതു മുടങ്ങിക്കിടക്കുകയാണ്. മണലെടുക്കുന്നതിനുള്ള തൊഴിലാളിയുടെ കൂലിയും നഗരസഭയുടെ വിഹിതവും യോഗത്തില്‍ തീരുമാനിച്ചു. ശുദ്ധീകരിച്ച ഒരു ടണ്‍ മണലിന് 19,000 രൂപയാണ് വില. ഇതുപ്രകാരം ഒരു ടണ്‍ മണലിനു പന്ത്രണ്ടായിരം രൂപയില്‍താഴെയാണ് വില വരിക. ഒരു ടണ്‍ മണലിന്റെ 35 ശതമാനം തുറമുഖ വകുപ്പിന് ലഭിക്കും. ഇതില്‍ 15 ശതമാനം പൊന്നാനി നഗരസഭയ്ക്കു ലഭിക്കും .
പൊന്നാനി നഗരസഭയ്ക്കു കീഴിലെ 12 മണല്‍കടവുകളിലായി 440 അംഗീകൃത മണല്‍ത്തൊഴിലാളികള്‍ക്കാണ് ഇതോടെ തൊഴില്‍ ലഭിക്കുക. ഇവര്‍ക്കു പുറമേ മറ്റു തൊഴിലാളികളെക്കൂടി ഉള്‍പ്പെടുത്തിയാണ് കടവുകള്‍ പ്രവര്‍ത്തിക്കുക.
പുറത്തൂര്‍ പഞ്ചായത്തിനു കീഴിലെ എട്ടു മണല്‍കടവുകളിലും അംഗീകൃത മണല്‍ത്തൊഴിലാളികള്‍ക്കാണ് തൊഴില്‍ ലഭിക്കുക. തൊഴിലാളികളുടെ ഇന്‍ഷുറന്‍സ് പരിരക്ഷ, മണല്‍ കൊണ്ടുപോകുന്നതിനുള്ള ചെലവ്, വൈദ്യുതിച്ചെലവ് എന്നിവ തുറമുഖ വകുപ്പില്‍നിന്നു മണലെടുക്കുന്ന സ്വകാര്യ കമ്പനി നേരിട്ടു വഹിക്കും.
തൊഴിലാളിക്കു കൂലിയിനത്തില്‍ പ്രതിധിനം 565 രൂപ നല്‍കും. പൂര്‍ണമായും ഓണ്‍ലൈന്‍വഴിയാണ് മണല്‍ വില്‍പന നടത്തുക. കരിഞ്ചന്തയില്‍ മണല്‍ വില്‍പന തടയാനാണ് ഈ നീക്കം. മണല്‍പാസ് ഹോളോഗ്രാം ചെയ്തു നല്‍കാനും തീരുമാനിച്ചിട്ടുണ്ട്.
തിരുവനന്തപുരത്തു തുറമുഖവകുപ്പ് പ്രിന്‍സിപ്പല്‍ സെക്രട്ടറിയുടെ അധ്യക്ഷതയില്‍ ചേര്‍ന്ന യോഗത്തില്‍ പൊന്നാനി നഗരസഭാ ചെയര്‍മാന്‍ മുഹമ്മദ് കുഞ്ഞി, പുറത്തൂര്‍ പഞ്ചായത്ത് പ്രസിഡന്റ് സുധാകരന്‍, തൊഴിലാളി യൂനിയന്‍ നേതാക്കളായ ഗംഗാധരന്‍, യൂസുഫ്, റസാഖ്, ബാബു എന്നിവര്‍ പങ്കെടുത്തു.