ദുബായ്: സമസ്ത കേരള ജംഇയ്യത്തുല്‍ ഉലമ സെക്രട്ടറിയും സുപ്രഭാതം ചെയര്‍മാനുമായ കോട്ടുമല ടി.എം ബാപ്പു മുസ്‌ലിയാര്‍ക്ക് ദുബായ് വിമാനത്താവളത്തില്‍ സ്വീകരണം നല്‍കി.

കടമേരി റഹ്മാനിയ്യ അറബിക് കോളജ് പൂര്‍വ്വ വിദ്യാര്‍ഥി സംഘടനയായ റഹ്മാനീസ് അസോസിയേഷന്‍ യു.എ.ഇ ചാപ്റ്റര്‍ സംഗമത്തിലും ഉത്തരമേഖലാ കമ്മറ്റിയുടെ 30-ാം വാര്‍ഷിക ജനറല്‍ബോഡി യോഗത്തിലും പങ്കെടുക്കാനാണ് സ്ഥാപനത്തിന്റെ പ്രിന്‍സിപ്പല്‍ കൂടിയായ കോട്ടുമല ദുബായിലെത്തിയത്.

കഴിഞ്ഞ ദിവസം ദുബായ അന്താരാഷ്ട്ര എയര്‍ പോര്‍ട്ടിലെ ടെര്‍മിനല്‍ വണില്‍ എത്തിയ അദ്ദേഹത്തെ സ്വീകരിക്കാന്‍ യു.എ.ഇ ഉത്തരമേഖലാ കമ്മിറ്റി ഭാരവാഹികളും റഹ്മാനീസ് ചാപ്റ്റര്‍ നേതാക്കളും പ്രവര്‍ത്തകരുമെത്തിയിരുന്നു.

അടുത്ത ദിവസം നടക്കുന്ന റഹ്മാനീസ് അസോസിയേഷന്‍ സംഗമത്തിലും ജനറല്‍ബോഡി യോഗത്തിലും പങ്കെടുക്കുന്ന ബാപ്പു മുസ്‌ലിയാര്‍ യു.എ.ഇയിലുടനീളം വിവിധ പരിപാടികളിലും സംബന്ധിക്കും. ഈ മാസം 30 ന് ബുധനാഴ്ച രാത്രി 8 മണിക്ക് അബൂദാബി ഇസ്‌ലാമിക് സെന്ററിലും സ്വീകരണ ചടങ്ങ് ഒരുക്കിയിട്ടുണ്ട്.

റഹ്മാനീസ് അസോസിയേഷന്‍ അബൂദാബി ചാപ്റ്ററും റഹ്മാനിയ്യ അബൂദാബി കമ്മറ്റിയും സംയുക്തമായി സംഘടിപ്പിക്കുന്ന ചടങ്ങില്‍ റഹ് മാനിയ്യ ബാനി മര്‍ഹൂം ചീക്കിലോട്ട് കുഞ്ഞമ്മദ് മുസ്‌ലിയാര്‍ അനുസ്മരണവും നടക്കും. ദുബൈ കെ.എം.സിസി ജനറല്‍ സെക്രട്ടറി ഇബ്‌റാഹീം മുറിച്ചാണ്ടി ഉദ്ഘാടനം ചെയ്യും. പ്രമുഖര്‍ സംബന്ധിക്കും.