ബെയ്ജിങ്: പടിഞ്ഞാറന്‍ ചൈനയിലെ സിന്‍ജിയാങ് പ്രവിശ്യയില്‍ ശക്തിയേറിയ ഭൂചലനം. ഇന്നലെ രാത്രി 7.54 നാണ് 6.5 തീവ്രത രേഖപ്പെടുത്തിയ ഭൂചലനമുണ്ടായത്. തെക്കന്‍ സിന്‍ജിയാങിലെ 12 കി.മി താഴ്ചയിലാണ് പ്രഭവകേന്ദ്രമെന്ന് യു.എസ് ജിയോളജിക്കല്‍ സര്‍വേ അറിയിച്ചു. ചൈനീസ് നഗരമായ കാഷ്ഗറില്‍ നിന്ന് താജികിസ്ഥാന്‍ അതിര്‍ത്തിക്കുള്ള 172 കി.മി അകലെയാണ് ഭൂകമ്പത്തിന്റെ പ്രഭവകേന്ദ്രം. നാശനഷ്ടമോ ആളപായമോ റിപ്പോര്‍ട്ട് ചെയ്യപ്പെട്ടിട്ടില്ല.
അതിനിടെ, മധ്യ അമേരിക്കയിലെ പസഫിക് തീരത്തും ശക്തിയായ ഭൂചലനമുണ്ടായി. റിക്ടര്‍ സ്‌കെയിലില്‍ 7.2 രേഖപ്പെടുത്തിയ ഭൂചലനം കരീബിയന്‍ തീരങ്ങളിലും കോസ്‌റ്റോ റിക്കയിലും അനുഭവപ്പെട്ടു. നാശനഷ്ടങ്ങള്‍ സംബന്ധിച്ച വിവരങ്ങള്‍ പുറത്തുവന്നിട്ടില്ല.
പസഫിക് തീരത്തുനിന്ന് ഒരു കിലോമീറ്റര്‍ അകലെ കടലിനടിയില്‍ 10.3 കി.മി ആഴത്തിലാണ് ഭൂകമ്പമുണ്ടായത്. ഒരു മീറ്റര്‍ വരെ ഉയരത്തില്‍ സുനാമി തിരമാലകള്‍ ഉണ്ടാകാമെന്ന് പസഫിക് സുനാമി മുന്നറിയിപ്പ് കേന്ദ്രം അറിയിച്ചു.
പിന്നീട് മുന്നറിയിപ്പ് പിന്‍വലിക്കുകയായിരുന്നു. ഭൂകമ്പത്തെ തുടര്‍ന്ന് കടല്‍ക്ഷോഭമുണ്ടായതായി റിപ്പോര്‍ട്ടുണ്ട്.