മലപ്പുറം: സംസ്ഥാന സ്‌കൂള്‍ കായിക മേളയുടെ പേരു മാറുന്നു. ഇനി മുതല്‍ ''സ്‌കൂള്‍ കായികോത്സവം'' എന്ന പേരിലാവും അറിയപ്പെടുക. കാലിക്കറ്റ് സര്‍വകലാശാലാ സ്റ്റേഡിയത്തില്‍ ഡിസംബര്‍ മൂന്നു മുതല്‍ ആറു വരെ നടക്കുന്ന 60ാ മത് സംസ്ഥാന സ്‌കൂള്‍ കായികോത്സവത്തിന്റെ കണ്‍വീനര്‍മാരുടെ അവലോകന യോഗത്തിലാണ് തീരുമാനമുണ്ടായത്. കായിക മേള പൂര്‍ണമായും പ്ലാസ്റ്റിക് മുക്തമാക്കും. ഗ്രീന്‍ പ്രോട്ടോകോള്‍ വ്യവസ്ഥകള്‍ക്ക് വിധേയമായായിരിക്കും മേള നടക്കുക. മൂന്നിനു രാവിലെ ഒന്‍പതു മണിക്ക് ഡി.പി.ഐ പതാക ഉയര്‍ത്തും. വൈകിട്ട് 3.30ന് വിദ്യാഭ്യാസ മന്ത്രി പ്രൊഫ. സി രവീന്ദ്രനാഥ് കായികോത്സവം ഉദ്ഘാടനം ചെയ്യും. പി.ടി. ഉഷ മുഖ്യാതിഥിയായിരിക്കും. ഇന്ത്യന്‍ ഹോക്കി ടീം മലയാളി ക്യാപ്റ്റന്‍ ശ്രീജേഷിനെ ഉദ്ഘാടന വേദിയില്‍ ആദരിക്കും. ആറിനു വൈകിട്ട് 4.30നു സമാപന സമ്മേളനം സ്പീക്കര്‍ പി ശ്രീരാമകൃഷ്ണന്‍ ഉദ്ഘാടനം ചെയ്യും. പ്രതിപക്ഷ നേതാവ് രമേശ് ചെന്നിത്തല മുഖ്യാതിഥിയായിരിക്കും.