ലണ്ടന്‍: യൂറോപ്യന്‍ പോരാട്ടങ്ങളില്‍ മാഞ്ചസ്റ്റര്‍ യുനൈറ്റഡിനായി ഏറ്റവും കൂടുതല്‍ ഗോളുകള്‍ നേടുന്ന താരമെന്ന റെക്കോര്‍ഡ് സ്വന്തമാക്കി ഒരു ഗോളുമായി നായകന്‍ വെയ്ന്‍ റൂണി മുന്നില്‍ നിന്നു നയിച്ചപ്പോള്‍ മാഞ്ചസ്റ്റര്‍ യുനൈറ്റഡ് 4-0ത്തിനു ഫയനൂര്‍ദിനെ തകര്‍ത്തു.
യുവേഫ യൂറോപ്പ് ലീഗ് പോരാട്ടത്തിലാണ് മാഞ്ചസ്റ്റര്‍ മികച്ച വിജയം സ്വന്തമാക്കി നോക്കൗട്ട് സാധ്യത സജീവമാക്കിയത്. റൂഡ് വാന്‍ നിസ്റ്റല്‍റൂയിയുടെ റെക്കോര്‍ഡ് 39ാം ഗോള്‍ നേടി തകര്‍ത്താണ് റൂണി തിളങ്ങിയത്.
35ാം മിനുട്ടില്‍ റൂണിയാണ് മാഞ്ചസ്റ്ററിന്റെ ഗോള്‍ വേട്ടയ്ക്ക് തുടക്കമിട്ടത്. 69ാം മിനുട്ടില്‍ യുവാന്‍ മാറ്റ, 90ാം മിനുട്ടില്‍ ലിംഗാര്‍ഡ് എന്നിവരും വല ചലിപ്പിച്ചു. ഒരു ഗോള്‍ സെല്‍ഫിലൂടെ ദാനമായും യുനൈറ്റഡിനു ലഭിച്ചു.
ഇറ്റാലിയന്‍ കരുത്തരായ ഇന്റര്‍ മിലാനെ ഹപോയല്‍ വീര്‍ ഷെവ 3-2നു അട്ടിമറിച്ചപ്പോള്‍ ഫ്രഞ്ച് ലീഗ് വണില്‍ മികച്ച മുന്നേറ്റം നടത്തുന്ന നീസിനെ ഷാല്‍ക്കെ 2-0ത്തിനു പരാജയപ്പെടുത്തി. ഫെനര്‍ബാഷെ 2-0ത്തിന സോറ്യയെ വീഴ്ത്തിയപ്പോള്‍ സതാംപ്ടനെ സ്പാര്‍ട പ്രഹ ഒറ്റ ഗോളിനു കീഴടക്കി.
വിയ്യാറല്‍- സുറിച് മത്സരം 1-1നു സമനില. ഇറ്റാലിയന്‍ ടീം റോമ വിക്ടോറിയ പ്ലാസനെ 4-1നും അത്‌ലറ്റിക്ക് ബില്‍ബാവോ 3-2നു സസോളോയേയും പരാജയപ്പെടുത്തി. മെയിന്‍സ്- സെയ്ന്റ് എറ്റിന്നെ പോരാട്ടം ഗോള്‍രഹിത സമനില.