കൂത്തുപറമ്പ്: ഫസല്‍ വധക്കേസില്‍ അന്വേഷണം നടത്തിയ സിബി.ഐ. സംഘത്തെ ഒഴിവാക്കി ഉന്നത സി.ബി.ഐ. ഉദ്യോഗസ്ഥരുള്‍പ്പെടുന്ന സംഘത്തെ കൊണ്ടു പുനരന്വേഷണം നടത്തണമെന്നു സി.പി.എം സംസ്ഥാന സെക്രട്ടറി കോടിയേരി ബാലകൃഷ്ണന്‍. കൂത്തുപറമ്പ് രക്തസാക്ഷിത്വ ദിനാചരണത്തിന്റെ ഭാഗമായി കൂത്തുപറമ്പ് മുന്‍സിപ്പല്‍ സ്റ്റേഡിയത്തില്‍ നടന്ന അനുസ്മരണ സമ്മേളനം ഉദ്ഘാടനം ചെയ്തു പ്രസംഗിക്കുകയായിരുന്നു അദ്ദേഹം. ഫസല്‍ വധക്കേസ് സംബന്ധിച്ച് മറ്റൊരു കേസില്‍ അറസ്റ്റിലായ ആര്‍.എസ്.എസ് പ്രവര്‍ത്തകന്റെ പുതിയ വെളിപ്പെടുത്തലിന്റെ അടിസ്ഥാനത്തില്‍ പുനരന്വേഷണം നടത്തുന്ന പൊലിസ് ഉദ്യോഗസ്ഥരെ ആര്‍.എസ്. എസ് നേതൃത്വം ഭയപ്പെടുത്താന്‍ ശ്രമിക്കുകയാണെന്നും അദ്ദേഹം പറഞ്ഞു.