തലശ്ശേരി: ഫസല്‍ വധക്കേസില്‍ ആര്‍.എസ്.എസിനു പങ്കുണ്ടെന്ന് പൊലിസ് കണ്ടെത്തിയ സാഹചര്യത്തില്‍ കേസില്‍ പുനരന്വേഷണം വേണമെന്നും നിലവില്‍ കേസന്വേഷിക്കുന്ന സി.ബി.ഐ അന്വേഷണസംഘത്തില്‍ കൂടുതല്‍ മുതിര്‍ന്ന ഉദ്യോഗസ്ഥരെ ഉള്‍പ്പെടുത്തണമെന്നും സി.പി.എം സംസ്ഥാന സെക്രട്ടറി കോടിയേരി ബാലകൃഷ്ണന്‍. പാതിരിയാട് വാളാങ്കിച്ചാലിലെ മോഹനന്‍ കൊലപാതക കേസ് അന്വേഷിക്കുന്ന സംഘം ഒരു പ്രതിയെ പിടികൂടിയപ്പോഴാണു ഫസല്‍ വധത്തില്‍ ആര്‍.എസ്.എസിന്റെ പങ്ക് പുറത്തുവന്നത്. ഇതിന്റെ അടിസ്ഥാനത്തില്‍ നിയമപരമായി തന്നെ കേസ് പുനരന്വേഷണം നടത്താമെന്നും അദ്ദേഹം വാര്‍ത്താസമ്മേളനത്തില്‍ പറഞ്ഞു.