കയ്പമംഗലം: ക്ഷീരവികസന വകുപ്പിന്റേയും മതിലകം ബ്ലോക്ക്പഞ്ചായത്തിന്റേയും ബ്ലോക്കിലെ ക്ഷീരസഹകരണ സംഘങ്ങളുടേയും സംയുക്താഭിമുഖ്യത്തില്‍ ആദികേശവപുരം ക്ഷീരസഹകരണ സംഘത്തിന്റെ ആതിഥേയത്തില്‍ മതിലകം ബ്ലോക്ക് തല ക്ഷീരകര്‍ഷക സംഗമവും ജില്ല തല തീറ്റപ്പുല്‍ കൃഷി ദിനാചരണവും കയ്പമംഗലത്ത് സംഘടിപ്പിച്ചു. ഇതോടനുബന്ധിച്ച് കന്നുകാലി പ്രദര്‍ശനം, ഗവ്യ ജാലകം, ഡയറി ക്വിസ്, ക്ഷീര കര്‍ഷകരെ ആദരിക്കല്‍, സെമിനാര്‍, പൊതു സമ്മേളനം, തീറ്റപ്പുല്ലുകളുടെ പ്രദര്‍ശനം എന്നിവ നടത്തി.
ആദികേശവപുരം സംഘം പരിസരത്ത് നടന്ന ചടങ്ങ് ഇ.ടി ടൈസന്‍ മാസ്റ്റര്‍ എം.എല്‍.എ ഉദ്ഘാടനം ചെയ്തു. കയ്പമംഗലം ഗ്രാമപഞ്ചായത്ത് പ്രസിഡന്റ്് ടി.വി സുരേഷ് അധ്യക്ഷനായി. ക്ഷീര വികസന വകുപ്പ് ജില്ലാ ഡെപ്യൂട്ടി ഡയറക്ടര്‍ മിനി രവീന്ദ്രദാസ് പദ്ധതി വിശദീകരണം നടത്തി.
രാവിലെ 11 ന് നടന്ന ക്ഷീരവികസന സെമിനാറില്‍ തൃശൂര്‍ ക്ഷീരവികസന വകുപ്പ് അസി.ഡയറക്ടര്‍ എ.ജെ ബാബു മോഡറേറ്ററായിരുന്നു. ആദായകരമായ ക്ഷീരോല്‍പാദനം തീറ്റപുല്‍ കൃഷിയിലൂടെ എന്ന വിഷയത്തില്‍ മണ്ണുത്തി ഡയറി സയന്‍സ് അസി.പ്രൊഫ. ഡോ. യാന്‍സി മേരി ഐസക്കും പശുപരിപാലനം പ്രായോഗിക സമീപനം എന്ന വിഷയത്തില്‍ കൊടുങ്ങല്ലൂര്‍ അസി.പ്രൊജക്ട് ഓഫിസര്‍ ഡോ. സുരേഷ് പി.ഡിയും ക്ലാസ് നയിച്ചു. വിവിധ ഗ്രാമപഞ്ചായത്ത് പ്രസിഡന്റുമാര്‍, ത്രിതല പഞ്ചായത്ത് ജനപ്രതിനിധികളും ചടങ്ങില്‍ പങ്കെടുത്തു.