കയ്പമംഗലം: കേരള കാര്‍ഷിക വികസന കര്‍ഷക ക്ഷേമ വകുപ്പിന്റെ ജൈവ കൃഷി പദ്ധതിയുടെ ഭാഗമായി ആരംഭിക്കുന്ന മതിലകം ബ്ലോക്ക് തല ഇക്കോ ഷോപ്പിന്റെ ഉദ്ഘാടനം ഇന്ന് നടത്തുമെന്ന് ഇ.ടി.ടൈസന്‍ മാസ്റ്റര്‍ എം.എല്‍.എ വാര്‍ത്താസമ്മേളനത്തില്‍ അറിയിച്ചു.
വൈകീട്ട് 4ന് കൃഷി വകുപ്പ് മന്ത്രി അഡ്വ. വി.എസ് സുനില്‍ കുമാര്‍ ഇക്കോ ഷോപ്പിന്റെ ഉദ്ഘാടനം നിര്‍വഹിക്കും. ജില്ലാ പഞ്ചായത്ത് പ്രസിഡന്റ് ഷീല വിജയകുമാര്‍ പെരിഞ്ഞനം പഞ്ചായത്തില്‍ നടപ്പിലാക്കുന്ന ജൈവ കൃഷി പദ്ധതിയുടെയും ജി.എ.പി ക്ലസ്റ്റര്‍ രൂപീകരണത്തിന്റെയും പ്രഖ്യാപനം നടത്തും. മതിലകം ബ്ലോക്ക് പഞ്ചായത്ത് പ്രസിഡന്റ് കെ.കെ അബീദലി ആദ്യ വില്‍പ്പന നടത്തും. വിവിധ ഗ്രാമപഞ്ചായത്ത് പ്രസിഡന്റുമാര്‍, ത്രിതല പഞ്ചായത്ത് ജനപ്രതിനിധികളും രാഷ്ട്രീയ കക്ഷി നേതാക്കളും ചടങ്ങില്‍ പങ്കെടുക്കും. പെരിഞ്ഞനം ഗ്രാമപഞ്ചായത്ത് പ്രസിഡന്റ് കെ.കെ സച്ചിത്ത്, മതിലകം കൃഷി അസിസ്റ്റന്റ് ഡയറക്ടര്‍ പി.ഉഷ, കൃഷി ഓഫിസര്‍ ജ്യോതി പി.ബിന്ദു വാര്‍ത്താസമ്മേളനത്തില്‍ പങ്കെടുത്തു.