മുംബൈ: മദ്യ വ്യവസായി വിജയ് മല്യയുടെ ആഡംബര ജെറ്റ് വിമാനം സേവന നികുതി വിഭാഗം വീണ്ടും ലേലം ചെയ്യാന്‍ ഒരുങ്ങുന്നു. 535 കോടി രൂപയാണ് വിജയ് മല്യയില്‍ നിന്ന് സേവന നികുതി വിഭാഗത്തിന് തിരിച്ച് പിടിക്കാനുള്ളത്.

മുമ്പ് വിമാനം ലേലം ചെയ്യാന്‍ ശ്രമം നടത്തിയെങ്കിലും ആരും വാങ്ങാന്‍ മുന്നോട്ട് വന്നിരുന്നില്ല. ഇതിനെ തുടര്‍ന്ന് ബോബെ ഹൈക്കോടതി ലേല വില പുനപരിശോധന നടത്താന്‍ നിര്‍ദേശിച്ചത്. ഇപ്പോള്‍ 152 കോടിയാണ് അടിസ്ഥാന വിലയായി നിശ്ചയിച്ചത്. നവംബര്‍ 28 നോ 29 നോ ആണ് ലേലം നടത്തുക.

ഇത് മൂന്നാം തവണയാണ് സേവന നികുതി വിഭാഗം മല്യയുടെ വിമാനം ലേലം ചെയ്യാന്‍ ഒരുങ്ങുന്നത്.ആദ്യ തവണ 1.09 കോടിയും രണ്ടാം തവണ 27 കോടിയുമാണ് ഉയര്‍ന്ന വിലയായി ലേലത്തില്‍ എത്തിയത് . ഇതിനെ തുടര്‍ന്നാണ് മൂന്നാം തവണയും ലേലം വിളിക്കാന്‍ തീരുമാനിച്ചത്.

എന്നാല്‍ ആഗോള മാധ്യമങ്ങളില്‍ വരെ പരസ്യം നല്‍കിയതിനാല്‍ ലേലം വിളിക്കാന്‍ കൂടുതല്‍ ആളുകള്‍ എത്തുമെന്ന് കരുതുന്നതായി സേവന നികുതി ഉദ്യോഗസ്ഥര്‍ പറഞ്ഞു