മൊഹാലി: ഇന്ത്യന്‍ ടെസ്റ്റ് ടീമിനെ പരുക്ക് വലയ്ക്കുന്നു. ഇംഗ്ലണ്ടിനെതിരായ ടെസ്റ്റ് സ്‌ക്വാഡില്‍ നിന്നു ഓള്‍ റൗണ്ടര്‍ ഹര്‍ദിക് പാണ്ഡ്യയെ ഒഴിവാക്കിയതാണ് ഏറ്റവും പുതിയത്. തോളെല്ലിനേറ്റ പരുക്കിനെ തുടര്‍ന്നാണ് ഹര്‍ദികിനെ ടീമില്‍നിന്നൊഴിവാക്കിയത്. കഴിഞ്ഞ ദിവസം നടന്ന പരിശീലനത്തിനിടെയാണ് ഹര്‍ദികിനു പരുക്കേറ്റത്.
മൂന്നാം ടെസ്റ്റിനു മുന്നോടിയായുള്ള പരിശീലനത്തിനിടെ പരുക്കേറ്റ് ഓപണര്‍ കെ.എല്‍ രാഹുലിനു അവസാന ഇലവനില്‍ സ്ഥാനം നഷ്ടമായിരുന്നു. ഇതിനു പിന്നാലെയാണ് ഹര്‍ദികിനും പരുക്കേറ്റത്. പരമ്പര തുടങ്ങിയ ശേഷം വിക്കറ്റ് കീപ്പര്‍ ബാറ്റ്‌സ്മാന്‍ വൃദ്ധിമാന്‍ സാഹയും പരുക്കേറ്റ് ടീമില്‍ നിന്നു പുറത്തേക്കുള്ള വഴി കണ്ടിരുന്നു. സാഹയ്ക്ക് പകരമെത്തിയ പാര്‍ഥിവ് പട്ടേലാണ് രാഹുലിനു പകരം മൂന്നാം ടെസ്റ്റില്‍ ഓപണറായി ഇറങ്ങിയത്.