അഡ്‌ലെയ്ഡ്: ദക്ഷിണാഫ്രിക്കയ്‌ക്കെതിരായ മൂന്നാം ക്രിക്കറ്റ് ടെസ്റ്റില്‍ ആസ്‌ത്രേലിയ ആശ്വാസ വിജയം സ്വന്തമാക്കി. മൂന്നു ടെസ്റ്റുകളടങ്ങിയ പരമ്പരയിലെ ആദ്യ രണ്ടു ടെസ്റ്റുകളും വിജയിച്ച് പരമ്പര നേരത്തെ ദക്ഷിണാഫ്രിക്ക നേടിയിരുന്നു. മൂന്നാം ടെസ്റ്റില്‍ ഏഴു വിക്കറ്റിനാണ് ഓസീസ് വിജയം പിടിച്ചത്.
127 റണ്‍സ് വിജയ ലക്ഷ്യത്തിലേക്ക് ബാറ്റേന്തിയ ഓസീസ് മൂന്നു വിക്കറ്റുകള്‍ മാത്രം നഷ്ടപ്പെടുത്തി ലക്ഷ്യം കണ്ടു. ഡേവിഡ് വാര്‍ണര്‍ (47), സ്റ്റീവന്‍ സ്മിത്ത് (40) മാറ്റ് റെന്‍ഷോ (34), എന്നിവര്‍ ഓസീസിനായി മികച്ച പ്രകടനം കാഴ്ചവച്ചു.
ആദ്യ ഇന്നിങ്‌സില്‍ ദക്ഷിണാഫ്രിക്ക ഒന്‍പതു വിക്കറ്റിനു 259 റണ്‍സെന്ന നിലയില്‍ ഡിക്ലയര്‍ ചെയ്തപ്പോള്‍ ആസ്‌ത്രേലിയ 383 റണ്‍സെടുത്തു. രണ്ടാം ഇന്നിങ്‌സില്‍ ദക്ഷിണാഫ്രിക്കയുടെ ചെറുത്തു നില്‍പ്പ് 250 അവസാനിച്ചു. ആറിനു 194 റണ്‍സെന്ന നിലയില്‍ ബാറ്റിങ് ആരംഭിച്ച ദക്ഷിണാഫ്രിക്കയുടെ ചെറുത്ത്‌നില്‍പ്പ് 250ല്‍ അവസാനിക്കുകയായിരുന്നു. ഓപണര്‍ സ്റ്റീഫന്‍ കുക്ക് (104) സെഞ്ച്വറി നേടി. ഓസീസിനായി മിച്ചല്‍ സ്റ്റാര്‍ക്ക് നാലും നതാന്‍ ലിയോണ്‍ മൂന്നും വിക്കറ്റ് നേടി. ആദ്യ ഇന്നിങ്‌സില്‍ സെഞ്ച്വറി നേടി ഓസീസ് ഇന്നിങ്‌സിനു കരുത്തായ ഉസ്മാന്‍ ഖവാജയാണ് കളിയിലെ താരം. വെറോണ്‍ ഫിലാന്‍ഡറാണ് പരമ്പരയുടെ താരം.