പട്ടിക്കാട്: സ്വകാര്യ ബസ് സര്‍വീസ് നിര്‍ത്തിവച്ചത് യാത്രക്കാരെ ദുരിതത്തിലാക്കി. കീഴാറ്റൂരില്‍ നിന്നും പട്ടിക്കാട് വഴി പെരിന്തല്‍മണ്ണ റൂട്ടിലോടിയിരുന്ന സ്വകാര്യ ബസാണ് സര്‍വീസ് നിര്‍ത്തിവച്ചത്. യാതൊരു മുന്നറിയിപ്പും കൂടാതെ സര്‍വീസ് നിര്‍ത്തിവച്ചതാണ് ഉള്‍നാടന്‍ ഗ്രാമങ്ങളിലെ യാത്രക്കാരെ ഏറെ വലച്ചത്.
രാവിലെ 6.50നും രാത്രി 7.40നും ഉള്‍പ്പെടെ മൂന്ന് ട്രിപ്പുകളായാണ് ബസ് സര്‍വീസ് നടത്തിയിരുന്നത്. പ്രദേശത്ത് നിന്നും ആദ്യം പുറപ്പെടുന്നതും ഈ ബസായിരുന്നു. ഇതിനാല്‍ രാവിലെ വിദ്യാഭ്യാസ ജോലി സംബന്ധമായ ആവശ്യങ്ങള്‍ക്കും മറ്റും പോകുന്നവരും വൈകീട്ട് തിരിച്ചുവരുന്നവരും ഈ ബസിനെയായിരുന്നു ആശ്രയിച്ചിരുന്നത്.
എന്നാല്‍ ഇപ്പോള്‍ ബസ് സര്‍വീസ് റദ്ദാക്കിയതോടെ രാവിലെ 8:30നാണ് പ്രദേശത്തു നിന്നും ആദ്യ ബസ് പുറപ്പെടുന്നത്. ഇതിനെ ആശ്രയിച്ചാല്‍ യാത്രക്കാര്‍ക്ക് കൃത്യ സമയങ്ങളില്‍ ജോലിക്ക് എത്താനും സാധിക്കുന്നില്ല. ബസ് സര്‍വീസ് പുനരാരംഭിച്ച് പ്രശ്‌നത്തിന് പരിഹാരം വേണമെന്നാവശ്യപ്പെട്ട് പഞ്ചായത്തംഗം സി.കെ രമാദേവിയുടെ നേതൃത്വത്തില്‍ നാട്ടുകാര്‍ പെരിന്തല്‍മണ്ണ ആര്‍.ടി.ഒയ്ക്ക് പരാതി നല്‍കിയിട്ടുണ്ട്.