തളിപ്പറമ്പ് : പരിയാരം മെഡിക്കല്‍ കോളജ് കോംപ്ലക്‌സിനകത്തെ ഫാര്‍മസി കോളജിനു നേരെ സാമൂഹ്യ വിരുദ്ധരുടെ അക്രമം. കഴിഞ്ഞ ദിവസം രാത്രിയിലാണു സംഭവം.
കോളജ് ലാബിലെ ജനല്‍ഗ്ലാസുകള്‍ എറിഞ്ഞുതകര്‍ത്ത അക്രമികള്‍ അകത്തു ലാബിലെ വിവിധവിഭാഗങ്ങള്‍ക്കായി വേര്‍തിരിച്ച സെക്ഷനുകളും തകര്‍ത്തിട്ടുണ്ട്. ലാബിനകത്തു നിന്നു കരിങ്കല്‍ ചില്ലുകള്‍ പൊലിസ് കണ്ടെടുത്തു. വിലപിടിപ്പുള്ള ചില്ലുകളാണ് എറിഞ്ഞുതകര്‍ത്തത്. ഒരു ലക്ഷം രൂപയുടെ നഷ്ടം കണക്കാക്കുന്നതായി കോളജ് അധികൃതര്‍ പരിയാരം പൊലിസില്‍ നല്‍കിയ പരാതിയില്‍ പറയുന്നു.
പരിയാരം എസ്.ഐ കെ.എന്‍ മനോജിന്റെ നേതൃത്വത്തില്‍ പൊലിസ് സ്ഥലത്തെത്തി അന്വേഷണം ആരംഭിച്ചു. അക്രമികളെ കണ്ടെത്തുന്നതിനു ഫാര്‍മസി കോളജിലെ സി.സി.ടി.വി കാമറകള്‍ പൊലിസ് പരിശോധിച്ചുവരികയാണ്.