തിരുവനന്തപുരം: സഹകരണ പ്രശ്‌നത്തില്‍ യോജിച്ചുള്ള സമരത്തിനു തയ്യാറാകാത്ത കോണ്‍ഗ്രസ് ബി.ജെ.പിയുടെ ബി ടീമായി മാറിയിരിക്കുകയാണെന്നു സി.പി.എം സംസ്ഥാന സെക്രട്ടറി കോടിയേരി ബാലകൃഷ്ണന്‍. അന്ധമായ സി.പി.എം വിരോധംമൂലം കെ.പി.സി.സി പ്രസിഡന്റ് വി.എം സുധീരന്‍ ബി.ജെ.പിയുമായി ഒത്തുകളിക്കുകയാണെന്നും കോടിയേരി കുറ്റപ്പെടുത്തി.
നോട്ടുപിന്‍വലിക്കല്‍ നടപടിയിലും സഹകരണ പ്രതിസന്ധിയിലും പ്രതിഷേധിച്ച് ഇടതുമുന്നണി ഇന്നലെ നടത്തിയ ഹര്‍ത്താലിനോടനുബന്ധിച്ചു തിരുവനന്തപുരത്തു നടന്ന പ്രതിഷേധ മാര്‍ച്ച് ഉദ്ഘാടനം ചെയ്യുകയായിരുന്നു അദ്ദേഹം. കള്ളപ്പണം പിടിക്കാനെന്ന പേരില്‍ രാജ്യത്തേയും പാവപ്പെട്ടവരേയും നരേന്ദ്രമോദി സര്‍ക്കാര്‍ ദുരന്തത്തിലേക്കു നയിച്ചിരിക്കുകയാണെന്നും അദ്ദേഹം പറഞ്ഞു.