സാന്‍ഫ്രാന്‍സിസ്‌കോ: അന്തരിച്ച ഫിദല്‍ കാസ്‌ട്രോയെ വിമര്‍ശിച്ച യു.എസ് നിയുക്ത പ്രസിഡന്റ് ഡൊണാള്‍ഡ് ട്രംപിന് മലയാളികളുടെ ഫേസ്ബുക്ക് 'പൊങ്കാല'. ഫിദല്‍ ക്രൂരനായ സ്വേച്ഛാധിപതിയാണെന്നും ക്യൂബന്‍ ജനതയ്ക്കുള്ള സ്വാതന്ത്ര്യം നിഷേധിച്ചെന്നുമായിരുന്നു ട്രംപിന്റെ ഫേസ്ബുക്ക് പോസ്റ്റ്.
ഇതിനുള്ള കമന്റായി മലയാളത്തിലും ഇംഗ്ലിഷിലുമാണ് മലയാളികള്‍ പ്രതിഷേധം രേഖപ്പെടുത്തിയത്. ചിലര്‍ അസഭ്യവര്‍ഷത്തോടെയാണ് ട്രംപിന്റെ പോസ്റ്റിനോട് പ്രതികരിച്ചത്.
ഇന്നലത്തെ മഴയില്‍ മുളച്ചുപൊങ്ങിയ താന്‍ 10 ലേറെ അമേരിക്കന്‍ പ്രസിഡന്റുമാരെ കൈകാര്യം ചെയ്ത ഫിദലിനെ കുറിച്ച് പറയാന്‍ ആളല്ലന്ന് ഒരു പോസ്റ്റില്‍ പറയുന്നു.
ട്രംപ് അമേരിക്കയിലെ ആര്‍.എസ്. എസാണെന്നാണ് മറ്റൊരു പ്രതികരണം. ട്രംപ് അല്‍പനാണെന്നും അര്‍ഹിക്കാത്ത അംഗീകാരമാണ് ഇയാളെ മത്തുപിടിപ്പിക്കുന്നതെന്നുമുണ്ടണ്ട് കമന്റ്.
ക്യൂബയ്ക്ക് സുന്ദരദിനങ്ങളും അമേരിക്കക്ക് കരാള ദിനങ്ങളുമാണ് വരാന്‍ പോകുന്നത് എന്ന് ആര്‍ക്കറിയാം തുടങ്ങി ഫിദലിനെ തൊട്ടാല്‍ ചോദിക്കാന്‍ ഞങ്ങള്‍ മലയാളികള്‍ ഉണ്ടെടാ എന്നിങ്ങനെ പോകുന്നു ട്രംപിനുള്ള മലയാളികളുടെ മറുപടി.
നേരത്തെ ക്രിക്കറ്റ് ഇതിഹാസം സച്ചിന്‍ ടെന്‍ഡുല്‍ക്കറെ അറിയില്ലെന്ന് മരിയ ഷറപ്പോവ നേരത്തെ പോസ്റ്റ് ചെയ്തതിനും മലയാളികള്‍ 'പൊങ്കാല'യര്‍പ്പിച്ചിരുന്നു.