മലപ്പുറം: 'ഹുബ്ബുര്‍റസൂല്‍ ഹുബ്ബുല്‍ വത്വന്‍' പ്രമേയത്തില്‍ സുന്നി യുവജന സംഘം ജില്ലാ കമ്മിറ്റി ഇന്നു മഞ്ചേരിയില്‍ ആമില മീലാദ് വിളംബര റാലി നടത്തും. വൈകിട്ട് നാലിനു കച്ചേരിപ്പടി ഐ.ജി.ബി.ടി ബസ് സ്റ്റാന്‍ഡ് പരിസരത്തുനിന്ന് ആരംഭിക്കുന്ന റാലി പഴയ ബസ് സ്റ്റാന്‍ഡ് പരിസരത്തു സമാപിക്കും.
അഞ്ചിനു മൗലിദ് പാരായണം നടക്കും. മഗ്‌രിബ് നിസ്‌കാര ശേഷം പൊതുസമ്മേളനം സമസ്ത ജനറല്‍ സെക്രട്ടറി കെ. ആലിക്കുട്ടി മുസ്്‌ലിയാര്‍ ഉദ്ഘാടനം ചെയ്യും. എസ്.വൈ.എസ് ജില്ലാ പ്രസിഡന്റ് പാണക്കാട് സയ്യിദ് അബ്ബാസലി ശിഹാബ് തങ്ങള്‍ അധ്യക്ഷനാകും. ജനറല്‍ സെക്രട്ടറി അബ്ദുസമദ് പൂക്കോട്ടൂര്‍ ആമുഖ പ്രഭാഷണം നടത്തും. സമസ്ത സെക്രട്ടറി കൊയ്യോട് ഉമര്‍ മുസ്‌ലിയാര്‍ പ്രമേയ പ്രഭാഷണം നിര്‍വഹിക്കും.
'ഒരു അമുസ്‌ലിമിന്റെ പ്രിയപ്പെട്ട ഇസ്‌ലാം' എന്ന പുസ്തകം രചിച്ച സുപ്രഭാതം എക്‌സിക്യൂട്ടീവ് എഡിറ്റര്‍ എ. സജീവന് സുന്നി യുവജന സംഘം ജില്ലാ കമ്മിറ്റിയുടെ ഉപഹാരം അബ്ബാസലി ശിഹാബ് തങ്ങള്‍ സമ്മാനിക്കും. 16 മണ്ഡലങ്ങളില്‍നിന്നുള്ള ആയിരക്കണക്കിന് ആമില അംഗങ്ങള്‍ മണ്ഡലത്തിന്റെ പ്രത്യേക ബാനറിനു പിന്നില്‍ അണിനിരന്ന് മൗലിദ് ബൈത്തുകളും സ്വലാത്തും ചൊല്ലിക്കൊണ്ടാണ് റാലി. ആമില അംഗങ്ങളല്ലാത്തവര്‍ക്ക് റാലിയില്‍ പങ്കെടുക്കാന്‍ അവസരമുണ്ടാകില്ല.
റാലിയുടെ മുന്നോടിയായി മൂന്നിനു മഞ്ചേരി സെന്‍ട്രല്‍ ജുമാമസ്ജിദ് ഖബര്‍സ്ഥാനില്‍ സിയാറത്ത് നടക്കും. റാലിക്കെത്തുന്ന ആമില അംഗങ്ങള്‍ തലപ്പാവുള്‍പ്പടെ വെള്ള വസ്ത്രം ധരിച്ചും സമസ്തയുടെ പതാകയും മുസ്വല്ലയും കൈയില്‍ കരുതിയും വരേണ്ടതാണ്.
മഞ്ചേരിയിലെയും പരിസരത്തെയും പള്ളികളില്‍നിന്ന് അസര്‍ നിസ്‌കരിച്ച ശേഷം നാലിനു മഞ്ചേരി കച്ചേരിപ്പടിയിലെ ഐ.ജി.ബി.ടി ബസ് സ്റ്റാന്‍ഡിലെത്തണമെന്നു ജില്ലാ ആമില റഈസ് കെ.ടി മൊയ്തീന്‍ ഫൈസി തുവ്വൂര്‍ അറിയിച്ചു.