മങ്കട: സ്‌കൂളുകളില്‍ പി.ടി.എ ഫണ്ടുപയോഗിച്ചു നിയമിച്ചിരുന്ന കംപ്യൂട്ടര്‍ ഇന്‍സ്ട്രക്ടര്‍മാരെ വീണ്ടും വിന്യസിക്കണമെന്ന് ആവശ്യം. ഐ.ടി അറ്റ് സ്‌കൂള്‍ പദ്ധതി ആരംഭിച്ച കാലത്താണ് അധ്യാപകരെ സഹായിക്കുകയെന്ന ലക്ഷ്യത്തോടെ ഹൈസ്‌കൂള്‍ ക്ലാസുകളില്‍ ഇന്‍സ്ട്രക്ടടര്‍മാരെ നിയമിച്ചിരുന്നത്.
പി.ടി.എയുടെ സാമ്പത്തിക സഹായത്തിലും പൂര്‍ണ ചുമതലയിലുമായിരുന്നു നിയമനം. അധ്യാപകര്‍ക്കു സര്‍ക്കാര്‍തലത്തില്‍ ഐ.ടി പരിശീലനം നല്‍കിയതോടെ ഇന്‍സ്ട്രക്ടര്‍മാരെ ഒഴിവാക്കാന്‍ വകുപ്പധികൃതര്‍ ഉത്തരവിട്ടിരുന്നു. ഐ.ടി പാഠഭാഗങ്ങളടക്കം ചുമതല അധ്യാപകര്‍ക്കായി നല്‍കിയാണ് ഇന്‍സ്ട്രക്ടര്‍മാരെ പിരിച്ചുവിടാന്‍ നിര്‍ദേശം നല്‍കിയിരുന്നത്.
എല്‍.പി, യുപി തലങ്ങളില്‍നിന്നു ഐ.ടി പുസ്തകം ഒഴിവാക്കിയതും ഇപ്പോള്‍ അധ്യാപകര്‍ക്കു വിനയായി. പലയിടത്തും കംപ്യൂട്ടറുകള്‍ തകരാറിലാകുന്നതുമൂലം കുട്ടികളുടെ ഐ.ടി പഠനം പ്രഹസനമായിരിക്കുകയാണ്.
അതേസമയം, എല്‍.പി, യു.പി തലങ്ങളില്‍ ഇതിനെതിരേ പരാതി ഉയര്‍ന്നിരുന്നെങ്കിലും ഇതിനെ തുടര്‍ന്നു പൊതുവിദ്യാഭ്യാസ വകുപ്പിനു കംപ്യൂട്ടര്‍ ഇന്‍സ്ട്രക്ടര്‍മാരെ ആവശ്യമില്ലെന്നു വകുപ്പധികൃതര്‍ ഉത്തരവിടുകയായിരുന്നു.
കംപ്യൂട്ടര്‍ ഇന്‍സ്ട്രക്ടര്‍മാരെ നിലനിര്‍ത്തുന്ന ഹെഡ്മാസ്റ്റര്‍മാര്‍ക്കെതിരേ നടപടിയെടുക്കാന്‍ എല്ലാ എ.ഇ.ഒമാരോടും പൊതുവിദ്യാഭ്യാസ വകുപ്പ് ഉത്തരവിട്ടിരുന്നു. അതോടെ, മുഴുവന്‍ സ്‌കൂളുകളിലെയും കംപ്യൂട്ടര്‍ ഇന്‍സ്ട്രക്ടര്‍മാരെ പിരിച്ചുവിടാന്‍ സ്‌കൂള്‍ മേധാവികള്‍ നിര്‍ബന്ധിതരാകുകയായിരുന്നു.