കാളികാവ്: കരുവാരകുണ്ട് തരിശ്‌ചേരിയിലെ കള്ളുഷാപ്പിനെതിരേയുള്ള സമരത്തിന് കുട്ടികളുടെ പിന്തുണ. നാല്‍പതാം ദിവസം പുല്‍വെട്ട നുസ്‌റത്തുല്‍ ഇസ്‌ലാം ഇംഗ്ലീഷ് സ്‌കൂളിലെ വിദ്യാര്‍ഥികളാണ് പിന്തുണയുമായി സമരപ്പന്തലിലെത്തിയത്. സമരം നടത്തിവരുന്നവര്‍ക്ക് അഭിവാദ്യമര്‍പ്പിക്കാനെത്തിയ കുട്ടികള്‍ കുറച്ച് നേരത്തേക്ക് സമരം ഏറ്റെടുത്തു. ചെറിയ കുട്ടികള്‍ മുദ്രാവാക്യം മുഴക്കി പിന്തുണയുമായി എത്തിയത് മുതിര്‍ന്നവര്‍ക്ക് ആവേശമായി.
സമര രംഗത്തുള്ള സ്ത്രീകള്‍ക്കും കുട്ടികളുടെ സാന്നിധ്യം ആവേശം പകര്‍ന്നു. വാത്സല്യപൂര്‍വം കുട്ടികളെ സ്വീകരിച്ച വീട്ടമ്മമാര്‍ തുടര്‍ന്ന് സമരം നയിച്ചു. സമരസമിതിരക്ഷാധികാരികളായ പി ഉണ്ണിമാന്‍, വാക്കയില്‍ ഹംസ ഹാജി, കണ്‍വീനര്‍ അമ്പാഴക്കോടന്‍ ഉമ്മര്‍, നരിമട സലീന, കെ.പി സുബൈദ, ഉഷ, നുസ്‌റത്തുല്‍ ഇസ്‌ലാം ഇംഗ്ലീഷ് എല്‍.പി സ്‌കൂള്‍ പ്രിന്‍സിപ്പല്‍ ഷിഹാബ് കാളികാവ്, സ്‌കൂള്‍ ലീഡര്‍ കെ.കെ ദിസാന്‍, ഡെ. ലീഡര്‍ എന്‍ സൗബാന്‍ സംസാരിച്ചു. അജീബ്, ഡാനിഷ്, ജലീഷ്, ബിന്‍ഷാദ് നേതൃത്വം നല്‍കി.