നാദാപുരം: മൂന്നു ദിവസം നീണ്ടുനില്‍ക്കുന്ന ഉപജില്ലാ കലോത്സവം നാദാപുരം ടി.ഐ.എം ഹയര്‍ സെക്കന്‍ഡറി സ്‌കൂളില്‍ ആരംഭിച്ചു. വൈകിട്ടുനടന്ന വര്‍ണാഭമായ ഘോഷയാത്ര മേളയുടെ പകിട്ട് കൂട്ടി. നിശ്ചല ദൃശ്യങ്ങളുടെ അകമ്പടിയോടെ നാദാപുരം താലൂക്ക് ആശുപത്രി പരിസരത്തു നിന്നും ആരംഭിച്ച ഘോഷയാത്രയില്‍ ജനപ്രതിനിധികളും സാംസ്‌കാരിക പ്രവര്‍ത്തകരും വിദ്യാര്‍ഥികളുംഅടക്കം നൂറുക്കണക്കിന് നാട്ടുകാര്‍ അണിനിരന്നു. മേളയുടെ ഉദ്ഘാടനം വൈകിട്ട് സ്‌കൂളിലെ പ്രധാന വേദിയില്‍ എ.കെ വിജയന്‍ എം.എല്‍.എ ഉദ്ഘാടനം ചെയ്തു. ഗ്രാമ പഞ്ചായത്ത് പ്രസിഡന്റ് എം.കെ സഫീറ അധ്യക്ഷയായി. ബ്ലോക്ക് പഞ്ചായത്ത് പ്രസിഡന്റ് സി.എച് ബാലകൃഷ്ണന്‍, പഞ്ചായത്തു പ്രസിഡന്റുമാരായ ഒ.സി ജയന്‍, തൊടുവയില്‍ മഹമൂദ്, ചന്തുമാസ്റ്റര്‍, തെങ്ങലക്കണ്ടി അബ്ദുല്ല, സി.വി കുഞ്ഞികൃഷ്ണന്‍, പി.കെ ദാമു, ടി കണാരന്‍, രജിന്ദ്രന്‍ കപ്പള്ളി, കെ.ടി.കെ ചന്ദ്രന്‍, എ.ഇ.ഒ വിജയന്‍, സി.കെ നാസര്‍, നാസര്‍ എടച്ചേരി എന്നിവര്‍ സംസാരിച്ചു. ഫോക്‌ലാര്‍ അക്കാദമി വൈസ് ചെയര്‍മാന്‍ എരഞ്ഞോളി മൂസ മുഖ്യാതിഥിയായി. എട്ടു വേദികളായി അയ്യായിരത്തോളം കുട്ടികള്‍ മത്സരങ്ങളില്‍ പങ്കെടുക്കുന്നുണ്ട്. മേള വ്യാഴാഴ്ച സമാപിക്കും.