കോട്ടയം: അഖിലേന്ത്യാ അന്തര്‍സര്‍വകലാശാല പുരുഷ വോളിബോള്‍ ചാംപ്യന്‍ഷിപ്പിനുള്ള കേരള സാങ്കേതിക സര്‍വകലാശാല ടീമില്‍ മറ്റക്കര ടോംസ് കോളജിന്റെ അഞ്ച് താരങ്ങള്‍ അംഗങ്ങളാകും. രണ്ടുമുതല്‍ പാലാ സെന്റ് തോമസ് കോളജിലാണ് ടൂര്‍ണമെന്റ് .
കേരള സാങ്കേതിക സര്‍വകലാശാലയുടെ ആഭിമുഖ്യത്തില്‍ നടന്ന പ്രഥമ വോളിബോള്‍ ടൂര്‍ണമെന്റില്‍ ആതിഥേയരായ മറ്റക്കര ടോംസ് എന്‍ജിനീയറിങ് കോളജ് ജേതാക്കളായിരുന്നു. കാഞ്ഞിരപ്പളളി അമല്‍ജ്യോതി എന്‍ജിനീയറിങ് കോളജിനെ 20-25,25-22.25-18,18-16 എന്നീ സ്‌കോറിനാണ് പരാജയപ്പെടുത്തിയത്. കിരീടം നേടിയ ടീമില്‍ നിന്നാണ് അഞ്ചു പേരെ സാങ്കേതിക സര്‍വകലാശാലാ ടീമിലേക്ക് തിരഞ്ഞെടുത്തത്.
സര്‍വകലാശാല ചാംപ്യന്മാരായ ടോംസ് കോളജ് ടീമിന് പാമ്പാടി ബ്ലോക് പഞ്ചായത്ത് പ്രസിഡന്റ് മാത്തച്ചന്‍ താമരശേരി ട്രോഫി നല്‍കി. മുന്‍ മുഖ്യമന്ത്രി ഉമ്മന്‍ചാണ്ടി, കെ.ടി.യു കായിക വകുപ്പ് മേധാവി, ഡോ.ജയരാജന്‍, ടോംസ് കോളജ് ചെയര്‍മാന്‍ ടോം ടി. ജോസഫ് , പ്രിന്‍സിപ്പല്‍ ഡോ.പി മുരുഗേശന്‍, ടീം കോച്ച് ജോപ്പി ജോര്‍ജ്, റൂബന്‍, മാനേജര്‍ എബിന്‍ , അമല്‍ജ്യോതി എന്‍ജിനീയറിങ് കോളജ് മാനേജര്‍ റവ. ഫാ. മാത്യു പായിക്കാട്ട് എന്നിവര്‍ പങ്കെടുത്തു.