കഠിനംകുളം: കാടിന്റെ മക്കളുടെ കരുത്തില്‍ നോര്‍ത്ത് ഉപജില്ലയിലെ കട്ടേല അയ്യങ്കാളി സ്മാരക റസിഡന്റ്‌സ് സ്‌കൂളിന് മൂന്നു മെഡലുകള്‍. സീനിയര്‍ ആണ്‍കുട്ടികളുടെ 110 മീറ്റര്‍ ഹഡില്‍സില്‍ ഒന്നും രണ്ടും സ്ഥാനങ്ങളും സബ്ജൂനിയര്‍ ആണ്‍കുട്ടികളുടെ 400 മീറ്റര്‍ ഓട്ടത്തില്‍ സ്വര്‍ണവും സ്‌കൂളിന് നേടിക്കൊടുത്തത് പാലക്കാട്, വയനാട് ആദിവാസി ഊരുകളില്‍ നിന്നെത്തിയ പ്രതിഭകളാണ്.
സീനിയര്‍ ആണ്‍കുട്ടികളുടെ വിഭാഗത്തില്‍ വയനാട് മീനങ്ങാടി കരണി ആദിവാസി ഊരിലെ സിനില്‍.എമ്മാണ് സ്വര്‍ണം നേടിയത് . വെള്ളി നേടിയത് പാലക്കാട് അട്ടപ്പാടിയില്‍ നിന്നെത്തിയ രമേഷ്.എ.സിയും. മൂന്ന് സെക്കന്റുകളുടെ വ്യത്യാസത്തിലാണ് ഇവര്‍ ഓടിയെത്തിയത്. സബ്ജൂനിയര്‍ വിഭാഗത്തില്‍ വയനാട് പടിഞ്ഞറത്തറ ഊരിലെ കണ്ണനാണ് സുവര്‍ണ നേട്ടം കൊയ്തത് .
പ്ലസ് വണ്‍ വിദ്യാര്‍ത്ഥിയാണ് സനില്‍. ഇതിന് മുന്‍പ് അമച്വര്‍ അത്‌ലറ്റിക് സംസ്ഥാന മീറ്റില്‍ സനില്‍ മത്സരിച്ചിട്ടുണ്ട്. രമേഷ് സബ്ജൂനിയര്‍ വിഭാഗത്തില്‍ ലോങ് ജമ്പില്‍ ദേശീയതലത്തില്‍ മത്സരിച്ചിട്ടുണ്ട്. രണ്ട് വര്‍ഷം മുമ്പാണ് കണ്ണന്‍ അയ്യങ്കാളി സ്‌കൂളിലെത്തിയത്. ആദ്യമായാണ് സ്‌കൂള്‍ മീറ്റില്‍ ജില്ലാ തലത്തില്‍ സ്വര്‍ണം നേടുന്നത്. പി.ആര്‍.എസ് നായരാണ് ഇവരുടെ പരീശീലകന്‍