നെടുമ്പാശ്ശേരി: സഊദി അറേബ്യയില്‍ നിന്നും പിടിയിലായ മലപ്പുറം കുനിയില്‍ ഇരട്ട കൊലപാതക കേസിലെ പ്രതിയെ നാട്ടിലെത്തിച്ചു. കൊളക്കാടന്‍ അബ്ദുള്‍ കലാം ആസാദ്, കൊളക്കാടന്‍ അബൂബക്കര്‍ എന്നിവരെ കൊലപ്പെടുത്തിയ കേസിലെ 17ാം പ്രതി അബ്ദുള്‍ സബൂറാണ് പിടിയിലായത്.
സഊദി അറേബ്യയില്‍ വച്ച് പിടിയിലായ പ്രതിയെ കുറ്റവാളികളെ പരസ്പരം കൈമാറാനുള്ള ഇന്ത്യസഊദി കരാര്‍ പ്രകാരം സഊദി പൊലിസ് ആദ്യമായി കൈമാറുന്ന പ്രതിയാണ് അബ്ദുള്‍ സബൂര്‍. ഇന്റര്‍പോള്‍ വഴിയാണ് ഇയാളെ നാട്ടിലെത്തിച്ചത്. സഊദിയില്‍ നിന്നും ഡല്‍ഹിയില്‍ എത്തിച്ച ശേഷം ഇന്നലെ രാത്രി 8 മണിയോടെയാണ് നെടുമ്പാശ്ശേരിയിലെത്തിച്ചത്.അഞ്ച് മാസങ്ങള്‍ക്ക് മുന്‍പാണ് ഇയാള്‍ സഊദി പോലീസിന്റെ കസ്റ്റഡിയിലായിരുന്നത്. നെടുമ്പാശ്ശേരി വിമാനത്താവളത്തില്‍ ഡി.വൈ.എസ്.പി മോഹനചന്ദ്രന്‍ പ്രതിയെ ഏറ്റുവാങ്ങി.
2012 ജൂണ്‍ 10 നായിരുന്നു കേസിനാസ്പദമായ സംഭവം. അരീക്കോട് കുനിയില്‍ കുറുവങ്ങാടന്‍ അതീഖു റഹ്മാന്‍ വധക്കേസിലെ പ്രതികളായിരുന്നു കൊല്ലപ്പെട്ട സഹോദരങ്ങളായ അബ്ദുള്‍ കലാം ആസാദും, അബൂബക്കറും. 2012 ജനുവരി അഞ്ചിന് ഫുട്‌ബോള്‍ മത്സരവുമായി ബന്ധപ്പെട്ട തര്‍ക്കത്തെ തര്‍ക്കത്തെ തുടര്‍ന്നാണ് അതീഖു റഹ്മാന്‍ കൊല്ലപ്പെട്ടത്. ഇതിന്റെ പ്രതികാരമായിരുന്നു ഇരട്ട കൊലപാതകം. ഈ കൊലപാതകത്തില്‍ ഗൂഢാലോചന നടത്തിയെന്നതാണ് ഇപ്പോള്‍ പിടിയിലായിട്ടുള്ള അബ്ദുള്‍ സബൂറിന് മേല്‍ ചാര്‍ജ് ചെയ്തിരിക്കുന്ന കുറ്റം.