കണ്ണൂര്‍: സംസ്ഥാനത്ത് പുതിയ എച്ച്.ഐ.വി ബാധിതരുടെ എണ്ണം പകുതിയായി കുറഞ്ഞതായി റിപോര്‍ട്ട്. എയ്ഡ്‌സ് കണ്‍ട്രോള്‍ സൊസൈറ്റിയുടെ കണക്കുകള്‍ പ്രകാരം 2006 മുതല്‍ 2016 ഒക്ടോബര്‍ വരെ 54 ശതമാനത്തിന്റെ കുറവാണു രേഖപ്പെടുത്തിയത്. എന്നാല്‍, പരിശോധനയ്‌ക്കെത്തുന്നവരുടെ എണ്ണം വന്‍തോതില്‍ വര്‍ധിച്ചതായി റിപോര്‍ട്ടില്‍ പറയുന്നു.
പൊതുവെ എച്ച്.ഐ.വി കേസുകള്‍ കുറയുമ്പോഴും ഒരു മാസം ശരാശരി 100 കേസുകള്‍ വരെ റിപ്പോര്‍ട്ട് ചെയ്യുന്നുണ്ട്. 2015ലെ കണക്കനുസരിച്ച് 20,954 എച്ച്.ഐ.വി അണുബാധിതരാണു സംസ്ഥാനത്തെ ഉഷസ് ചികിത്സാ കേന്ദ്രങ്ങളില്‍ പേര് രജിസ്റ്റര്‍ ചെയ്തിട്ടുള്ളത്. ഇതില്‍ 15,071 പേര്‍ക്ക് എ.ആര്‍.ടി ചികിത്സ തുടങ്ങി. നിലവില്‍ 11,236 പേരാണു ചികിത്സയിലുള്ളത്. അണുബാധിതരില്‍ 4,673 പേര്‍ ഇതിനകം മരിച്ചു. 2002 മുതല്‍ 2016 ഒക്ടോബര്‍ വരെ തിരുവനന്തപുരം ജില്ലയില്‍ 6,65,136 പേര്‍ പരിശോധന നടത്തി. ഇതില്‍ 5,649 പേര്‍ക്ക് അണുബാധ സ്ഥിരീകരിച്ചിട്ടുണ്ട്.
ഓരോ ജില്ലയിലും അണുബാധ സ്ഥിരീകരിച്ചവരുടെ എണ്ണവും റിപോര്‍ട്ടില്‍ പറയുന്നുണ്ട്. കൊല്ലം-1,075, പത്തനംതിട്ട-683, ആലപ്പുഴ-1,269, കോട്ടയം-2,484, ഇടുക്കി-431, എറണാകുളം-1,934, തൃശ്ശൂര്‍-4,843, പാലക്കാട്-2,580, മലപ്പുറം-567, കോഴിക്കോട്-4,423, വയനാട്-266, കണ്ണൂര്‍-1,641, കാസര്‍കോട്-1,376 എന്നിങ്ങനെയാണു ജില്ലകള്‍ തിരിച്ചുള്ള കണക്ക്. ജില്ലകളിലെ എച്ച്.ഐ.വി പരിശോധനാ കേന്ദ്രങ്ങളില്‍ നിന്നുള്ള കണക്കാണിത്. പരിശോധന നടത്തിയവര്‍ അതത് ജില്ലക്കാര്‍ മാത്രമായിരിക്കില്ല.
ദേശീയ എയ്ഡ്‌സ് നിയന്ത്രണ ഓര്‍ഗനൈസേഷന്റെ കണക്കു പ്രകാരം രാജ്യത്ത് 21.17 ലക്ഷം എച്ച്.ഐ.വി ബാധിതരാണുള്ളത്. ഇതില്‍ 39 ശതമാനം സ്ത്രീകളും 6.54 ശതമാനം കുട്ടികളുമാണ്.