ന്യൂഡല്‍ഹി: കടുത്ത പനിയെ തുടര്‍ന്ന് ചികിത്സയിലായിരുന്ന കോണ്‍ഗ്രസ് അധ്യക്ഷ സോണിയ ഗാന്ധി ആശുപത്രി വിട്ടു. രണ്ടു ദിവസമായി സോണിയ ചികിത്സയിലായിരുന്നു.

പനി കുറഞ്ഞുവെന്നും ആരോഗ്യനില തൃപ്തികരമാണെന്നും സോണിയയെ ചികിത്സിച്ച ശ്രീ ഗംഗാ റാം ആശുപത്രിയിലെ ഡോക്ടര്‍ അരുണ്‍ കുമാര്‍ ബസു പറഞ്ഞു. രാവിലെ 11.30 ഓടെയാണ് 69 വയസുകാരിയായ സോണിയ ആശുപത്രി വിട്ടത്.

കഴിഞ്ഞ മൂന്നുമാസത്തിനിടെ ഇത് രണ്ടാം തവണയാണ് സോണിയ ഗാന്ധിയെ ആശുപത്രിയില്‍ പ്രവേശിപ്പിക്കുന്നത്. തോളിലെ വേദനയും പനിയും നിര്‍ജ്ജലീകരണവും ബാധിച്ചതിനെ തുടര്‍ന്ന് 69കാരിയായ സോണിയയെ ഓഗസ്റ്റ് മൂന്നിന് ഇതേ ആശുപത്രിയില്‍ പ്രവേശിപ്പിച്ചിരുന്നു.

വാരണാസിയിലെ റോഡ് ഷോയെ തുടര്‍ന്ന് ആയിരുന്നു അന്ന് ആശുപത്രിയില്‍ പ്രവേശിപ്പിച്ചത്. ശാരീരികാസ്വാസ്ഥ്യം അനുഭവിച്ചതിനെ തുടര്‍ന്ന് അവര്‍ റോഡ് ഷോ ഉപേക്ഷിച്ചിരുന്നു. തുടര്‍ന്ന് ഇടതുതോളില്‍ ഓപ്പറേഷന്‍ നടത്തിയിരുന്നു.

ഷിംലയില്‍ ദീര്‍ഘകാലം അവധിക്കാലം ചെലവഴിച്ചതിനു ശേഷം കഴിഞ്ഞയാഴ്ച ആയിരുന്നു സോണിയ ഡല്‍ഹിയില്‍ എത്തിയത്.