പട്ടാമ്പി: സബ് ജില്ല കലോത്സവ വേദികളില്‍ മത്സരാര്‍ഥികളായ പെണ്‍കുട്ടികളെ ചൂഷണം ചെയ്യുന്ന പൂവാല ശല്യത്തിനെതിരെ നടപടി എടുക്കിന്നില്ലെന്ന് പരാതി. പട്ടാമ്പി, തൃത്താല സബ്ജില്ലകളില്‍ ഇത്തരക്കാരുടെ ശല്യം അധികരിച്ചതിനെ തുടര്‍ന്ന് രക്ഷിതാക്കളാണ് ബന്ധപ്പെട്ടവരോട് പരാതിപ്പെട്ടത്.ഇത്തരക്കാര്‍ക്കെതിരെ പൊലിസ് നടപടി എടുക്കണമെന്ന ആവശ്യം ശക്തമായിട്ടുണ്ട്.
അനധികൃതമായി വിദ്യാലയങ്ങളില്‍ പ്രവേശിച്ച് വിദ്യാര്‍ഥിനികളെ വലയിലാക്കി പല വഴിവിട്ട ബന്ധങ്ങള്‍ക്ക് ഇത്തരക്കാര്‍ ശ്രമം നടത്തുന്നുണ്ടെന്ന് രക്ഷിതാക്കളും അധ്യാപകരും വ്യക്തമാക്കുന്നു. അതെ സമയം സബ്ജില്ല കലോത്സവ വേദികളില്‍ വിവിധ വിദ്യാലയങ്ങളില്‍ നിന്ന് വന്ന ആണ്‍കുട്ടികള്‍ പലപേരിലും അടിപിടികള്‍ നടത്തി കലോത്സവ വേദികളെ അലങ്കോലമാക്കുന്നതും വര്‍ധിച്ചിട്ടുണ്ട്. ഇത്തരത്തിലുള്ള സംഭവങ്ങള്‍ ഇല്ലാതാക്കാന്‍ നിശ്ചിത എണ്ണം നിയമപാലകര്‍ രംഗത്ത് ഉണ്ടെങ്കിലും ശക്തമായ രീതിയിലുള്ള നടപടികളൊന്നും കൈ കൊള്ളുന്നില്ല. അത് കൊണ്ട് തന്നെ ഇക്കൂട്ടര്‍ക്ക് ഇത് രക്ഷയാകുന്നു.
അതെ സമയം എക്‌സ്‌കോര്‍ട്ടിങ് അധ്യാപകര്‍ക്ക് ഇത്തരം പൂവാലശല്യക്കാരെ കൊണ്ട് പൊറുതിമുട്ടിയതിനെ തുടര്‍ന്ന് പ്രധാനധ്യാപകര്‍ക്ക് ഇതു സംബന്ധിച്ച് ഇത്തരക്കാര്‍ക്കെതിരെ നിയമനടപടി എടുക്കണമെന്ന ആവശ്യവുമായി രംഗത്ത് വന്നിട്ടുണ്ട്.
വിവിധ വിദ്യാലയങ്ങളില്‍ നിന്നും പരിപാടിയിലൊന്നും പങ്കെടുക്കാത്ത  ക്ലാസ് കട്ട് ചെയ്ത് വരുന്ന വിദ്യാര്‍ഥികളാണ് ഇത്തരം പ്രവൃത്തികളില്‍ ഏര്‍പ്പെടുന്നതെന്ന് കലോത്സവ വേദികളിലെ ബന്ധപ്പെട്ടവര്‍ പരാതി ഉയര്‍ന്നതിനെ തുടര്‍ന്ന് വ്യക്തമാക്കുന്നത്.