അഗളി: അട്ടപ്പാടിയിലെ ആദിവാസി ശിശുമരണങ്ങളും പോഷകാഹാര കുറവും ഇല്ലാതാക്കാന്‍ അട്ടപ്പാടില്‍ സമഗ്ര വികസന പാക്കേജ് വേണമെന്ന് പ്രതിപക്ഷ നേതാവ് രമേശ് ചെന്നിത്തല പറഞ്ഞു. അട്ടപ്പാടി മേഖലയില്‍ ശിശുമരണങ്ങള്‍ ഉണ്ടായ പ്രദേശം സന്ദര്‍ശിച്ചശേഷം അഗളിയില്‍ നടത്തിയ പത്രസമ്മേളനത്തില്‍ സംസാരിക്കുകയായിരുന്നു അദ്ദേഹം. മുന്‍സര്‍ക്കാരിന്റെ കാലത്ത് ആദിവാസി സ്ത്രീകള്‍ ഗര്‍ഭിണിയാകുന്നതുമുതല്‍ പ്രസവം വരേയുള്ള കാലയളവില്‍ നിരന്തര പരിചരണവും ശുശ്രൂഷയും ഉറപ്പുവരുത്തുന്ന പദ്ധതികളുണ്ടായിരുന്നു. ഇപ്പോള്‍ ആ രീതി മാറിയിട്ടുണ്ടെന്നതിന്റെ തെളിവാണ് ഈ സര്‍ക്കാര്‍ അധികാരത്തിലെത്തിയ ശേഷം നടന്ന ആറു ശിശുമരണങ്ങള്‍.
പോഷകാഹാര കുറവും കൃത്യമായ പരിചരണവും കിട്ടാതെയാണ് ഈ കുഞ്ഞുങ്ങള്‍ മരിക്കാനിടയായതെന്നും അദ്ദേഹം ആരോപിച്ചു. ആദിവാസി സമൂഹത്തിന് മുന്‍ സര്‍ക്കാരിന്റെ കാലത്ത് നല്‍കിയിരുന്ന പല പദ്ധതികളും നിലവില്‍ അട്ടിമറിക്കപ്പെട്ടു. അട്ടപ്പാടിയിലെ സമഗ്ര വികസനത്തിനായി വിവിധ വകുപ്പുകളെ ഏകോപിച്ച് കൊണ്ടുള്ള അട്ടപ്പാടി പാക്കേജിന് രൂപം നല്‍കുന്നതിനായി മുഖ്യമന്ത്രിക്ക് നിവേദനം നല്‍കുമെന്നും അദ്ദേഹം പറഞ്ഞു.
സമ്പൂര്‍ണ പാര്‍പ്പിട പദ്ധതി, കുടിവെള്ള പദ്ധതി, കാര്‍ഷിക പാക്കേജ്, ആരോഗ്യരംഗം കാര്യക്ഷമാക്കുക, അഭ്യസ്ത വിദ്യരായ എല്ലാ വര്‍ക്കും തൊഴില്‍ നല്‍കുക, റേഷന്‍ സംവിധാനത്തില്‍ കാര്യക്ഷമത ഉറപ്പു വരുത്തുക തുടങ്ങിയവ പാക്കേജില്‍ ഉള്‍പ്പെടുത്തുമെന്നും അദ്ദേഹം പറഞ്ഞു. കേരളത്തില്‍ സമ്പൂര്‍ണ ശുചിത്വ യജ്ഞം പൂര്‍ത്തീകരിക്കണമെങ്കില്‍ അട്ടപ്പാടിയില്‍ 3500 ശൗചാലയങ്ങള്‍ കൂടി നിര്‍മിക്കേണ്ടി വരുമെന്നും പ്രതിപക്ഷ നേതാവ് കൂട്ടിച്ചേര്‍ത്തു.