തിരുവനന്തപുരം: ആരോഗ്യ സര്‍വകലാശാല ഓള്‍ കേരള ഇന്റര്‍ കോളജ് അത്‌ലറ്റിക്ക് മീറ്റില്‍ കണ്ണൂര്‍ കനോസ നഴ്‌സിങ് കോളജ് 57 പോയിന്റ് നേടി കിരീടം കരസ്ഥമാക്കി. വനിതാ വിഭാഗത്തിലും കനോസ കിരീടം നേടി. തുടര്‍ച്ചയായ അഞ്ചാം വര്‍ഷമാണ് കനോസ വനിതാ ചാംപ്യന്‍ഷിപ്പിനര്‍ഹരായത്. ഗവ. ഹോമിയോ മെഡിക്കല്‍ കോളജ് തിരുവനന്തപുരം 38 പോയിന്റുമായി രണ്ടാം സ്ഥാനം നേടി. പുരുഷ വിഭാഗത്തില്‍ 36 പോയിന്റുമായി മലബാര്‍ മെഡിക്കല്‍ കോളജ് ഒന്നാം സ്ഥാനവും 25 പോയിന്റുമായി ആലപ്പുഴ ഗവ. ടി.ഡി മെഡിക്കല്‍ കോളജ് രണ്ടാം സ്ഥാനവും നേടി. വനിതാ വിഭാഗത്തില്‍ പരിയാരം കോളജ് ഓഫ് നഴ്‌സിങ് 20 പോയിന്റുമായി രണ്ടാം സ്ഥാനം നേടി. മാര്‍ച്ച് പാസ്റ്റില്‍ തിരുവനന്തപുരം ഗവ. നഴ്‌സിങ് കോളജ് ഒന്നാം സ്ഥാനവും കാരക്കോണം സി.എസ്.ഐ മെഡിക്കല്‍ കോളജ് രണ്ടാം സ്ഥാനവും നേടി. അടൂര്‍ മൗണ്ട് സിയോണിലെ നവനീത് ആര്‍. മികച്ച പുരുഷ അത്‌ലറ്റായും തിരുവനന്തപുരം ഗവ. ഹോമിയോ മെഡിക്കല്‍ കോളജിലെ ജ്യോതിസ് ജേക്കബ് മികച്ച വനിതാ അത്‌ലറ്റായും തിരഞ്ഞെടുക്കപ്പെട്ടു.