ന്യൂഡല്‍ഹി: ദിവസങ്ങള്‍ക്കു മുന്‍പ് നാലാം റാങ്കിലെത്തി കരിയറിലെ മികച്ച ടെസ്റ്റ് റാങ്കിലേക്ക് കയറിയ ഇന്ത്യന്‍ നായകന്‍ വിരാട് കോഹ്‌ലി ഒരു സ്ഥാനം കൂടി മെച്ചപ്പെടുത്തി മൂന്നാം റാങ്കില്‍.
ഒപ്പം ഓള്‍റൗണ്ടര്‍ രവീന്ദ്ര ജഡേജയും റാങ്കിങില്‍ നില മെച്ചപ്പെടുത്തി. ഓള്‍റൗണ്ടര്‍മാരുടെ പട്ടികയില്‍ നാലാം സ്ഥാനത്തേക്ക് കയറിയ ജഡേജ രണ്ടു സ്ഥാനങ്ങളാണ് മെച്ചപ്പെടുത്തിയത്. ഇംഗ്ലണ്ടിനെതിരായ മൂന്നാം ടെസ്റ്റ് വിജയമാണ് ഇരുവരേയും കരിയറിലെ മികച്ച റാങ്കിലേക്ക് നയിച്ചത്. രണ്ടാം ടെസ്റ്റിനു ശേഷം ബാറ്റ്‌സ്മാന്‍മാരുടെ പട്ടികയില്‍ നാലാം റാങ്കിലെത്തിയ കോഹ്‌ലി മൂന്നാം ടെസ്റ്റിനു ശേഷം മൂന്നാം റാങ്കിലേക്കു കയറുകയായിരുന്നു.
ബാറ്റ്‌സ്മാന്‍മാരുടെ പട്ടികയില്‍ ആസ്‌ത്രേലിയന്‍ നായകന്‍ സ്റ്റീവന്‍ സ്മിത്ത്  ഒന്നാം സ്ഥാനത്തും ഇംഗ്ലണ്ടിന്റെ ജോ റൂട്ട് രണ്ടാം സ്ഥാനത്തും.