ഹരിപ്പാട്: കാറും ബൈക്കും കൂട്ടിയിടിച്ച് ബൈക്ക് യാത്രികരായ രണ്ട് യുവാക്കള്‍ മരിച്ചു. കരുവാറ്റ ഗ്രാമപഞ്ചായത്തംഗം പുത്തന്‍പറമ്പില്‍ കെ.ആര്‍.രാജന്റെ മകന്‍ ശ്രീകാന്ത് (21), കരുവാറ്റ ചെറുകാട്ടില്‍ വിശ്വനാഥന്റെ മകന്‍ അഖില്‍നാഥ് (കുട്ടച്ചന്‍-22) എന്നിവരാണ് മരിച്ചത്.
ദേശീയപാതയില്‍ കരുവാറ്റ ആശ്രമം ജങ്ഷന് തെക്ക് വ്യാഴാഴ്ച രാത്രി 11.30 നായിരുന്നു അപകടം. തെക്ക് നിന്ന് വന്ന കാര്‍ എതിരേ വന്ന ബൈക്കില്‍ ഇടിക്കുകയായിരുന്നു. ശ്രീകാന്ത് സംഭവ സ്ഥലത്ത് വെച്ച് തന്നെ മരിച്ചു. ഗുരുതരമായി പരുക്കേറ്റ അഖില്‍നാഥ് വണ്ടാനം മെഡിക്കല്‍ കോളജ് ആശുപത്രിയിലേക്ക് കൊണ്ടുപോകും വഴിയാണ് മരിച്ചത്. സുഹൃത്തുക്കളായ ഇരുവരും മറ്റൊരു സുഹൃത്തിന്റെ വീട്ടിലേക്ക് പോകും വഴിയായിരുന്നു അപകടം.
 ശ്രീകാന്ത് എം.ബി.എ വിദ്യാര്‍ഥിയാണ്. മാതാവ്: പുഷ്പലത. സഹോദരന്‍: ശ്രീരാജ്. മോഹിനിയാണ് അഖില്‍നാഥിന്റെ മാതാവ്. മൃതദേഹങ്ങള്‍ പോസ്റ്റുമോര്‍ട്ടം നടത്തി ബന്ധുക്കള്‍ക്ക് വിട്ടുകൊടുത്തു. ഇരുവരുടെയും സംസ്‌കാരം ഇന്ന് നടക്കും.