തിരുവനന്തപുരം: നോട്ട് അസാധുവാക്കല്‍ സാമ്പത്തിക മേഖലയില്‍ സൃഷ്ടിച്ച പ്രതിസന്ധി കണക്കിലെടുത്ത് വാണിജ്യ ദേശസാല്‍കൃത ബാങ്കുകള്‍ വായ്പകളിന്‍മേല്‍ മൊറട്ടോറിയം പ്രഖ്യാപിക്കണമെന്ന് പ്രതിപക്ഷ നേതാവ് രമേശ് ചെന്നിത്തല. കേന്ദ്ര ധനകാര്യമന്ത്രി അരുണ്‍ ജയ്റ്റ്‌ലിക്ക് അയച്ച കത്തിലാണ്  അദ്ദേഹം ഈ ആവശ്യം ഉന്നയിച്ചത്. പ്രതിസന്ധി കണക്കിലെടുത്ത് കേരളം സഹകരണ ബാങ്കുകളിലെ വായ്പകളിന്‍മേല്‍ മാര്‍ച്ച് 31 വരെ മൊറിട്ടോറിയം പ്രഖ്യാപിച്ചിട്ടുണ്ട്. സഹകരണ മേഖലയില്‍ മാത്രമല്ല, സംസ്ഥാനത്ത് മറ്റെല്ലാ മേഖലകളിലും പ്രതിസന്ധി നിലനില്‍ക്കുകയാണ്. ഈ പശ്ചാത്തലത്തില്‍ വാണിജ്യ ബാങ്കുകളിലേയും ദേശസാല്‍കൃത ബാങ്കുകളിലേയും വായ്പകളില്‍  50 ദിവസത്തേക്കെങ്കിലും മൊറിട്ടോറിയം ഏര്‍പ്പെടുത്തണ്ടേത് അത്യാവശ്യമാണ്. ബാങ്കുകളില്‍ ആവശ്യത്തിന് നോട്ട് ഇല്ലാത്തതിനാല്‍  ശമ്പള വിതരണം അവതാളത്തിലാവുമെന്ന പരിഭ്രാന്തിയിലാണ് ജീവനക്കാര്‍. അതിനാല്‍ ശമ്പള വിതരണം സുഗമമാക്കുന്നതിനുള്ള നടപടി സ്വീകരിക്കണമെന്നും ചെന്നിത്തല കത്തില്‍ ആവശ്യപ്പെട്ടു.