ഗൂഡല്ലൂര്‍: മദ്യലഹരിയില്‍ പിതാവിനെ കൊലപ്പെടുത്തിയ കേസില്‍ മകന്‍ പൊലിസ് പിടിയില്‍. ശ്രീമധുര കൊറവയല്‍ ആദിവാസി കോളനിയിലെ മാണിക്യ(60)ത്തെ കൊലപ്പെടുത്തിയ കേസിലാണ് മകന്‍ മാണി (35)യെ സ്‌പെഷ്യല്‍ ബ്രാഞ്ച് അറസ്റ്റു ചെയ്തത്.
സി.ഐ ശക്തിവേലു, ബാബു എന്നിവരുടെ നേതൃത്വത്തിലുള്ള സ്‌പെഷ്യല്‍ ബ്രാഞ്ച് സംഘമാണ് കൊലക്ക് ശേഷം വനത്തിലേക്ക് രക്ഷപ്പെട്ട മാണിയെ പിടികൂടിയത്. ഗൂഡല്ലൂര്‍ കോടതിയില്‍ ഹാജരാക്കിയ പ്രതിയെ റിമാന്റ് ചെയ്തു. ദേവാല നെല്ലിക്കുന്നില്‍ നിന്നാണ് ഇന്നലെ പൊലിസ് നാടകീയമായി മാണിയെ പിടികൂടിയത്. കഴിഞ്ഞ ഞായറാഴ്ച രാത്രിയിലാണ് മാണി പിതാവിനെ കൊന്നത്. മദ്യലഹരിയിലായ പിതാവും മകനും വാക്കേറ്റമുണ്ടാകുകയും ക്ഷുഭിതനായ മാണി പട്ടിക കഷ്ണം ഉപയോഗിച്ച് പിതാവിനെ തലക്ക് അടിച്ച് കൊലപ്പെടുത്തുകയുമായിരുന്നെന്ന് പൊലിസ് വൃത്തങ്ങള്‍ പറഞ്ഞു.