ഷാര്‍ജ: അല്‍ നാദയിലെ ബന്ദരി ട്വിന്‍ ടവറില്‍ വന്‍ അഗ്നിബാധ. ബി ബ്ലോക്കിലെ 13ാം നിലയില്‍ ഇന്നലെ ഉച്ചയോടെയാണ് സംഭവം.തുടര്‍ന്ന് മറ്റു നിലകളിലേക്കും തീ വ്യാപിച്ചതായി ഷാര്‍ജ സിവില്‍ ഡിഫന്‍സ് അറിയിച്ചു. ആളപായം റിപ്പോര്‍ട്ട് ചെയ്യപ്പെട്ടിട്ടില്ല. മലയാളിയുടേത് ഉള്‍പ്പെടെ എട്ടു ഫ്‌ളാറ്റുകള്‍ കത്തിനശിച്ചിട്ടുണ്ട്. അല്‍ ഇത്തിഹാദ് റോഡിലാണ് ടവര്‍ സ്ഥിതിചെയ്യുന്നത്. ഇരട്ട ബഹുനില താമസ സമുച്ചയമാണിത്.
അല്‍ ഇത്തിഹാദ് റോഡ് അടച്ച ശേഷമാണ് രക്ഷാപ്രവര്‍ത്തനം നടത്തിയത്. ഒന്നരയോടെ തീ നിയന്ത്രണ വിധേയമാക്കിയതായി സിവില്‍ ഡിഫന്‍സ് അറിയിച്ചു. ലക്ഷക്കണക്കിന് ദിര്‍ഹമിന്റെ നാശനഷ്ടം കണക്കാക്കുന്നു. അത്യാധുനിക സംവിധനങ്ങളോടെ വളരെ പെട്ടെന്നുതന്നെ സിവില്‍ ഡിഫന്‍സ് തീയണയ്ക്കുകയും കെട്ടിടത്തില്‍ കുടുങ്ങിയവരെ പുറത്തെത്തിക്കുകയും ചെയ്തു.