ഫറോക്ക്: ഹെല്‍മെറ്റ് പരിശോധനക്കിടെ ഹോംഗാര്‍ഡ് വിദ്യാര്‍ഥിയെ മര്‍ദിച്ചതായി പരാതി. സംഭവത്തെ തുടര്‍ന്നു ഫറോക്ക് കരുവന്‍തിരുത്തി റോഡില്‍ ജനം സംഘടിച്ചെത്തിയത് സംഘര്‍ഷാവസ്ഥ സൃഷ്ടിച്ചു.
കരുവന്‍തിരുത്തി ആരിയേക്കല്‍ ഹൗസില്‍ അന്‍സാറിന്റെ മകന്‍ മുബശിറി(20)നെയാണ് ഫറോക്ക് പൊലിസിലെ ഹോംഗാര്‍ഡ് മര്‍ദിച്ചെന്ന പരാതിയുള്ളത്. ഇന്നലെ വൈകിട്ട് അഞ്ചരയോടെയാണ് സംഭവം. കോമണ്‍വെല്‍ത്ത് ടൈല്‍ കമ്പനിക്കും റെയില്‍വേ അടിപ്പാതക്കും ഇടയിലായി പാതയരോത്ത് പൊലിസ് വാഹന പരിശോധന നടത്തുകയായിരുന്നു. ഇതിനിടെ കടന്നുവന്ന വിദ്യാര്‍ഥിയെ ഹെല്‍മെറ്റില്ലാത്തതിനാല്‍ കൈകാണിച്ചതിനെ തുടര്‍ന്ന് ബൈക്ക് അല്‍പ്പം മുന്നോട്ടെടുത്തു നിര്‍ത്തി. ഉടന്‍ പരിശോധന സംഘത്തിലുണ്ടായിരുന്ന ഒരു പൊലിസുകാരന്‍ ചാവി ഊരിയെടുത്ത് കൈ വലിക്കുകയും കൂടെയുണ്ടായിരുന്നു ഹോംഗാര്‍ഡ് മുഖത്ത് അടിക്കുകയുമായിരുന്നുവെന്നാണ് പരാതി.
ഫറോക്ക് കോപറേറ്റിവ് കോളജ് രണ്ടാം വര്‍ഷ ബിരുദ വിദ്യാര്‍ഥിയായ മുബശിറിനെ പിതാവും നാട്ടുകാരും ചേര്‍ന്നു ഫറോക്ക് ചുങ്കത്തെ സ്വകാര്യ ആശുപത്രിയില്‍ പ്രവേശിപ്പിച്ചു. ഫറോക്ക് എസ്.ഐക്കു വിദ്യാര്‍ഥിയുടെ പിതാവ് പരാതി നല്‍കി.