അങ്കമാലി: അങ്കമാലി ആലുക്കാസില്‍ 900 പവന്‍ കവര്‍ന്ന കേസില്‍ മുഖ്യ പ്രതി അങ്കമാലി മജിസ്‌ട്രേറ്റ് കോടതിയില്‍ ഇന്നലെ രാവിലെ ഹാജരായി.
തൃപ്പൂണിത്തുറ ഫ്‌ളാറ്റില്‍ താമസിക്കുന്ന അങ്കമാലി തുറവുര്‍ കൃഷ്ണാജ്ഞലിയില്‍ ഷര്‍മ്മിള (35) ആണ് കോടതിയില്‍ ഹാജരായത്. കോടതി 14 ദിവസം റിമാന്‍ഡ് ചെയ്തതിനെ തുടര്‍ന്ന് ഇവരെ കാക്കനാട് ജില്ലാ വനിതാ ജയിലില്‍ അടച്ചു.2016 ജൂലൈ മുതല്‍ സെപ്തംബര്‍ വരെ ആലൂക്കാസില്‍ നിന്നും ചെക്ക് നല്‍കി 900 പവന്‍ സ്വര്‍ണ്ണം വാങ്ങുകയും പകരം ചെക്കുകള്‍ നല്‍കുകയും ചെയ്യുകയായിരുന്നു.
ചില ചെക്കുകള്‍ ബാങ്കില്‍ പ്രസന്റ് ചെയ്‌തെങ്കിലും ആലുക്കാസിന്റെ അങ്കമാലി മാനേജര്‍ ഇടപെട്ട് ചെക്കുകള്‍ മരവിപ്പിക്കുകയായിരുന്നു. പല ചെക്കുകളും മാനേജര്‍ കളക്ഷന് വിടാതെ മാറ്റി വച്ചിരുന്നു.കഴിഞ്ഞ സെപ്തംബര്‍ 20ന് നടത്തിയ ഓഡിറ്റിങ്ങിലാണ് 7203.91 ഗ്രാം സ്വര്‍ണ്ണത്തിന്റെ കുറവ് കണ്ടെത്തിയത്.
തുടര്‍ന്ന് ജോയി ആലുക്കാസിന്റെ കേരള റീജിണല്‍ മാനേജര്‍ ആഷിക് സേവ്യര്‍ അങ്കമാലി പൊലിസിന് പരാതി കൊടുക്കുകയായിരുന്നു. പ്രതിയ ഷര്‍മ്മിളയെ കസ്റ്റഡിയില്‍ ലഭിക്കുവാന്‍ അങ്കമാലി പൊലിസ് കോടതിയില്‍ അപേക്ഷ നല്‍കി.