തേഞ്ഞിപ്പലം: നാളെ മുതല്‍ കാലിക്കറ്റ് സര്‍വകലാശാലയില്‍ നടക്കുന്ന സംസ്ഥാന സ്‌കൂള്‍ കായികമേളയുടെ ഭാഗമായി ശുദ്ധമായ കുടിവെള്ള ലഭ്യത ഉറപ്പുവരുത്തുന്നതിനായി ആരോഗ്യവകുപ്പ് സര്‍വകലാശാലയിലെ ജലം പരിശോധിച്ചു. കടലുണ്ടിപ്പുഴയില്‍നിന്നു പമ്പ് ചെയ്ത വെള്ളം ശുദ്ധീകരിച്ചാണ് കാംപസില്‍ വിതരണം നടത്തുന്നത്.
ആയിരക്കണക്കിന്നു വിദ്യാര്‍ഥികള്‍ പങ്കെടുക്കുന്ന മേളയായതിനാല്‍ ജലത്തിന്റെ ശുദ്ധത ഉറപ്പുവരുത്താനാണ് പരിശോധന നടത്തിയത്. കാംപസില്‍ വിതരണം ചെയ്യുന്ന വെള്ളത്തിന്റെ സാംപിള്‍ കോഴിക്കോട് മലാപറമ്പിലുള്ള ലബോറട്ടറിയില്‍ പരിശോധന നടത്തി. വെള്ളത്തില്‍ കുഴപ്പമൊന്നുമില്ലെന്നു കണ്ടെത്തി. എന്നാലും ടാങ്കുകളിലെത്തിക്കുന്ന വെള്ളം ഒന്നുകൂടി സൂപ്പര്‍ ക്ലോറിനേഷന്‍ നടത്തിക്കാന്‍ നിര്‍ദേശം നല്‍കിയിട്ടുണ്ട്.
മേളയില്‍ പങ്കെടുക്കുന്നവര്‍ താമസിക്കുന്ന സ്‌കൂളുകളിലും വകുപ്പധികൃതര്‍ പരിശോധന നടത്തി. പകര്‍ച്ചവ്യാധികള്‍ തടയാനുള്ള മുന്‍കരുതലുകളും സ്വീകരിക്കുന്നുണ്ട്. പരിശോധനയില്‍ ഹെല്‍ത്ത് ഇന്‍സ്‌പെക്ടര്‍ ഒ. സത്യനാഥന്‍, ജൂനിയര്‍ ഹെല്‍ത്ത് ഇന്‍സ്‌പെക്ടര്‍മാരായ അരുണ്‍കുമാര്‍, ജയ്‌സല്‍ എന്നിവര്‍ പങ്കെടുത്തു.