കൊളത്തൂര്‍: വളാഞ്ചേരി-വളപുരം റൂട്ടില്‍ നിയന്ത്രണം വിട്ട ബസ് സമീപത്തെ മതിലിലിടിച്ച് 16 പേര്‍ക്ക് സാരമായി പരുക്കേറ്റു. ഇന്നലെ രാവിലെ 8.10ഓടെയാണ് അപകടം. വളപുരത്തു നിന്നും വളാഞ്ചേരി ഭാഗത്തേക്ക് പോകുകയായിരുന്ന തെക്കേക്കര ബസാണ് അപകടത്തില്‍പ്പെട്ടത്. മൂര്‍ക്കനാട് വടക്കുംപുറത്തിന്റെയും പുന്നക്കാടിന്റെയും ഇടയില്‍ വെളളിയാംകുഴി ഇറക്കത്തില്‍ എത്തിയപ്പോള്‍ നിയന്ത്രണം വിട്ട ബസ് സീമപത്തെ മതിലില്‍ ഇടിക്കുകയായിരുന്നു. ഇടിയുടെ ആഘാതത്തില്‍ ബസ് റോഡിനു കുറുകെ മറിഞ്ഞു.
ബസിന്റെ മുന്‍വശം പൂര്‍ണമായും തകര്‍ന്നിട്ടുണ്ട്. വളപുരം സ്വദേശികളായ ശ്രീത, ഷീന, സമിന, തസ്‌നി, മുഹ്‌സിന മറിയ, ഫെബിന ഷെറിന്‍, ഷുഹുദ, നഫീസ എന്നിവരെയും പുന്നക്കാട് സ്വദേശികളായ അഞ്ജലി, മിറാന്‍, മുഹമ്മദ് ഹബീബ്, വെണ്ടല്ലൂര്‍ സ്വദേശികളായ ഫഹ്മിന്‍, ബുഷ്‌റ, ഷിനിയ്യ, കാവുംപുറം സ്വദേശികളായ ഷാജന്‍, ഷാഹുല്‍ ഹമീദ് എന്നിവരെയും പരുക്കുകളോടെ വളാഞ്ചേരിയിലെ നടക്കാവില്‍ ആശുപത്രിയില്‍ പ്രവേശിപ്പിച്ചു.
ക്രെയിന്‍ ഉപയോഗിച്ച് ബസ് നീക്കിയതിനു ശേഷമാണ് ഗതാഗതം പൂര്‍വസ്ഥിതിയിലായത്.