എടവണ്ണ: ചാലിയാറിലെവടശ്ശേരി കടവിലെ അനധികൃതമണലെടുപ്പ് പൊലിസ് പിടികൂടി. വെള്ളിയാഴ്ച രാവിലെയാണ് വടശ്ശേരി കടവില്‍ എസ്.പിയുടെ നിയന്ത്രണത്തിലുള്ള 'ഓപ്പറേഷന്‍ അറ്റ് ചാലിയാര്‍' മണല്‍സ് കോഡ് അംഗങ്ങള്‍ അനധികൃതമായി മണലൂറ്റ് പിടികൂടിയത്. തുടര്‍ന്ന് എടവണ്ണ എസ്.ഐ കെ.എം സന്തോഷ് കുമാര്‍, ഗ്രേഡ് എസ്.ഐ എന്‍.പി അസൈന്‍ എന്നിവരുടെ നേതൃത്വത്തിലുള്ള പൊലിസും സ്ഥലത്തെത്തി. ഇതിനിടെ തൊഴിലാളികള്‍ രക്ഷപ്പെടുകയും ചെയ്തു. തുടര്‍ന്ന് തോണി പൊലിസ് കസ്റ്റഡിയിലെടുക്കുകയും കരയിലും മറ്റും കൂട്ടിയിട്ടിരുന്ന മണല്‍ മണ്ണുമാന്തിയന്ത്രം ഉപയോഗിച്ചു പുഴയിലേക്കു തന്നെ തിരികെ നിക്ഷേപിക്കുകയും ചെയ്തു.
തോണി മണലൂറ്റാന്‍ ഉപയോഗിച്ചിട്ടിലെന്നു പറഞ്ഞ് ഒരു വിഭാഗം ആളുകളെത്തിയത് പൊലിസും നാട്ടുകാരും തമ്മിലുള്ള വാക്കേറ്റത്തിനിടയാക്കി. പഞ്ചായത്തംഗം പി.പി അബ്ദുറഹിമാന്റെ നേതൃത്വത്തില്‍ ഇരുകൂട്ടരും ചര്‍ച്ച ചെയ്ത ശേഷമാണ് തോണി വിട്ടു നല്‍കിയത്. കടവിനു സമീപത്തായി നിര്‍ത്തിയിട്ടിരുന്ന മൂന്നു ബൈക്കുകളും പൊലിസ് കസ്റ്റഡിയിലെടുത്തു.