നെടുമങ്ങാട്: നിത്യേന നൂറുകണക്കിനാളുകള്‍ സന്ദര്‍ശിക്കുന്ന നെടുമങ്ങാട് മാര്‍ക്കറ്റില്‍ കയറണമെങ്കില്‍ മൂക്ക് പൊത്തണം. അത്രയ്ക്ക് വൃത്തിഹീനമാണ് ഇവിടം.
ഇറച്ചിയുടേയും മത്സ്യങ്ങളുടേയും പച്ചക്കറികളുടേയും അവശിഷ്ടങ്ങള്‍ മാര്‍ക്കറ്റിനുള്ളില്‍ കുമിഞ്ഞു കുടിയിരിക്കുന്നു. നഗരസഭയുടെ മാലിന്യം നീക്കം ചെയ്യല്‍ താളം തെറ്റിയ നിലയിലാണ്. മാലിന്യക്കൂമ്പാരത്തില്‍ നിന്നും ഈച്ചയും കൊതുകും പെരുകുന്നു. ഇത് സാംക്രമിക രോഗങ്ങള്‍ പടരാന്‍ സാധ്യതയുണ്ട്. മാര്‍ക്കറ്റില്‍ എത്തുന്നവരും കച്ചവടക്കാരും ദുരിതത്തിലാണ്. ഇറച്ചിയുടെ അവശിഷ്ടം വര്‍ധിച്ചതോടെ തെരുവ് നായ്ക്കളുടെ ശല്യവും വര്‍ധിച്ചു. നായ്ക്കളുടെ കടിയേറ്റു പരുക്ക് പറ്റിയവരും നിരവധിയാണ്. മാര്‍ക്കറ്റ് നവീകരണത്തിന് ലക്ഷങ്ങള്‍ ചിലവാക്കിയെന്നു അവകാശവാദം നിരത്തുമ്പോഴാണ് നാട്ടുകാര്‍ക്ക് ഈ ദുരിതം.