കണ്ണൂര്‍: ലോക ഭിന്നശേഷി സംസ്ഥാനതല ദിനാഘോഷത്തിന്റെ ഭാഗമായി ജില്ലാ പഞ്ചായത്തിന്റെയും സാമൂഹ്യനീതി വകുപ്പിന്റെയും ആഭിമുഖ്യത്തില്‍ കണ്ണൂര്‍ പൊലിസ് പരേഡ് ഗ്രൗണ്ടില്‍ നടന്ന ഭിന്നശേഷി കുട്ടികളുടെ ജില്ലാതല കായിക മത്സരത്തില്‍ കാരക്കുണ്ട് ഡോണ്‍ ബോസ്‌കോ 99 പോയിന്റുമായി ജേതാക്കളായി. വിളയാങ്കോട് കാരുണ്യ നികേതന്‍ 82 പോയിന്റുമായി രണ്ടാം സ്ഥാനവും ബക്കളം മരിയന്‍ സ്‌പെഷല്‍ സ്‌കൂള്‍ 50 പോയിന്റുമായി മൂന്നാം സ്ഥാനവും നേടി. ബധിരമൂക വിഭാഗം, അസ്ഥി സംബന്ധമായ വൈകല്യമുള്ളവര്‍, കാഴ്ച വൈകല്യമുള്ളവര്‍, ബുദ്ധിമാന്ദ്യം എന്നിങ്ങനെ നാലു വിഭാഗങ്ങളിലായാണ് മത്സരങ്ങള്‍ നടന്നത്. ജില്ലാ പഞ്ചായത്ത് ക്ഷേമകാര്യ സ്റ്റാന്‍ഡിങ് കമ്മിറ്റി ചെയര്‍പേഴ്‌സണ്‍ ടി.ടി റംല ഉദ്ഘാടനം ചെയ്തു. അഡ്വ. ലിഷ ദീപക് അധ്യക്ഷയായി. ജില്ലാ സ്‌പോര്‍ട് കൗണ്‍സില്‍ പ്രസിഡന്റ് ഒ.കെ വിനീഷ് മുഖ്യാതിഥിയായി. ജില്ലാ സാമൂഹ്യനീതി ഓഫിസര്‍ എന്‍ ഷീബ, അഡ്വ. ജലീല്‍ അഹമ്മദ്, ടി.എന്‍ മുരളീധരന്‍, കെ രാജീവന്‍, വിജയകുമാരി, ഒ വിജയ, സി.എ ബിന്ദു സംസാരിച്ചു.