ചെറുപുഴ: പെരിങ്ങോം ഗവ.ഹയര്‍സെക്കന്‍ഡറി സ്‌കൂളില്‍ നടന്ന പയ്യന്നൂര്‍ ഉപജില്ലാ സ്‌കൂള്‍ കലോത്സവം സമാപിച്ചു. ഹയര്‍സെക്കന്‍ഡറി വിഭാഗത്തില്‍ ഷേണായ് സ്മാരകാ ഗവ.ഹയര്‍സെക്കന്‍ഡറി ഒന്നാം സ്ഥാനവും ജി.എച്ച്.എച്ച്.എസ് മാതമംഗലം രണ്ടാം സ്ഥാനവും നേടി. ഹൈസ്‌കൂള്‍ വിഭാഗത്തിലും യു.പി വിഭാഗത്തിലും എസ്.എ.ബി.ടി.എം തായിനേരി ഒന്നാം സ്ഥാനവും സെന്റ് മേരീസ് ഗേള്‍സ് ഹൈസ്‌കൂള്‍ പയ്യന്നൂര്‍ രണ്ടാം സ്ഥാനവും നേടി.
എല്‍.പി വിഭാഗത്തില്‍ ജി.എല്‍.പി.എസ് മാതമംഗലവും സെന്റ് മേരീസ് യു.പി.എസ് പയ്യന്നൂരും ഒന്നാം സ്ഥാനം പങ്കിട്ടു. രണ്ടാം സ്ഥാനം സെന്റ് മേരീസ് സ്‌കൂള്‍ പയ്യന്നൂരും ജെ.എം.യു.പി സ്‌കൂള്‍ ചെറുപുഴയും കരസ്ഥമാക്കി. സമാപന സമ്മേളനം സി കൃഷ്ണന്‍ എം.എല്‍.എ ഉദ്ഘാടനം ചെയ്തു. അഡ്വ.ശശി വട്ടക്കൊവ്വല്‍ അധ്യക്ഷനായി. പയ്യന്നൂര്‍ ബ്ലോക്ക് പഞ്ചായത്ത് പ്രസിഡന്റ് സി സത്യപാലന്‍ സമ്മാനദാനം നിര്‍വഹിച്ചു.